《Watch Dogs Legion（看門狗：自由軍團）》於 2020 年 10 月 29 日上市，為《Watch Dogs》系列嘅第三隻作品，今集舞台黎到英國倫敦。記得遊戲於去年公佈不久，香港爆發大型社會運動，要求抗強權、爭取自由嘅聲音不斷，與《Watch Dogs Legion》裡面反霸權及反監控等等劇情頗為異曲同工，後來遊戲於香港嘅宣傳明顯減少，所以編輯部一度擔心過呢隻遊戲到底能否於香港上架。

感恩地，遊戲可以如期推出；又好彩地，編輯部比發售日提早幾天獲得媒體 Review 版本遊戲，所以都盡快寫下呢篇遊戲感想，與各位讀者分享。

《Watch Dogs Legion》與前作於理念上最大分別，就係講緊玩家唔再係「一匹狼」孤軍作戰，而係「全民皆兵」。大家只要理念相同，就可以由陌生人變成戰友。每個人嘅能力同埋技能唔同，有人勇武，有人玩網路戰；有人潛入政府大樓，有人爬上高牆噴油玩文宣，總之各自小心 Be water。

《Watch Dogs Legion》故事舞台，已經係《Watch Dogs 2》40 年後嘅架空版倫敦，DedSec 一次行動失敗，失去大量手足，而中心人物 Sabine（沙賓）亦要流亡在外。不過，呢個未來嘅世界，政治環境非常有趣，原本係權力重心嘅警察，都不敵於外來嘅武裝組織：民間軍事公司「阿爾比恩」，因為成個倫敦基本上由「阿爾比恩」控制，佢地隨意監控市民、隨意拘捕市民、亦可以隨意對市民施行暴力。

聽落去似曾相識，不過遊戲終歸是遊戲，一定無現實咁血腥。《Watch Dogs Legion》於難度上明顯比第二集低，可以操控各種無人機、以及 Upgrade 咗隻遙控蜘蛛之後，於遊戲首章過後，已經是「黑客無雙」。

例如我嘅玩法係，安坐於「運貨無人機」高高在上，然後用隻蜘蛛落去清場；敵人血量均等，絕大部份潛入，都可以靠蜘蛛技術性擊倒，亦可以靠蜘蛛領取大部份資源。

玩家仲可以反利用敵方各種攻擊向嘅無人機，射 Laser，射追蹤爆彈（！），其實都幾屈機；加上遊戲各種駭入或者解碼都偏向簡單，相信就算係 Casual Gamer 都可以輕鬆攻略。簡單還簡單，可以喺電話度撳個制就炸飛敵人，呢一點依然係好爽，放工玩都幾發洩到壓力。

今集最創新嘅「全民皆兵」概念相信係遊戲最有特色嘅地方。玩家可以偵測其他路人有咩能力，覺得佢嘅能力可取，就可以挑戰該角色嘅支線任務，完成後該 NPC 就會加入你嘅團隊。

所謂「能力」可以好實用，亦可以好搞笑。有人係專長於提供武器、載具；有人係擅長 Hacking；有人係擅長獲得群眾 Attention；亦都會有人係擅長「擅自拎你嘅錢去賭」或者「去買衫有折」，件事非常多元、亦非常人性化。

遊戲會隨住劇情推進而推薦一啲角色比你，但玩家亦可以自由挑選／建立自己嘅特務團隊，或者你鍾意無視佢呢個功能，堅持玩「一匹狼」都可以，自由度極高。

佢個介紹想點……

無論玩家使用邊個角色進行遊戲，「科技」相關技能、金錢等要素係全體角色共通的，遊戲中可以收集一盒綠色嘅「科技點數」，儲夠指定數量就可以於後台提昇／學習新技能；技能主要係 Hacking 類別，亦有部份係強化槍械特性。不過呢隻係「駭客遊戲」，所以就無攻擊力／HP 長短之分，而防身類別亦只有一項「減傷」技能，如果玩家想操控一班黑客落場打近身戰嘅話，相信會令遊戲難度增加不少。

無人機＋蜘蛛無雙真係好歡樂

《Watch Dogs Legion》都係一隻幾「大食」嘅 Game，我分別於 Xbox One 及 Xbox Series X 上運行遊戲，於 Xbox One 上進行遊戲入 Game 時間接近 45 秒；而於 Xbox Series X 上入 Game 則是少於 10 秒，畫面呈現及光影質感有明顯提昇。

相信遊戲似乎傾向針對次世代主機機能而開發，假如玩家未入手遊戲，我會建議你於購置 PS5 或者 Xbox Series X 後（以上：買唔買到機係後話）先至買 Game 就最為合適。

唐人街

講開畫面，Ubisoft 一向極擅長「還原景點」，今次嘅倫敦的確還原度高，不過著名景點如白金漢宮、大英博物館等等都只能遠觀，「於核心外圍」轉圈圈，大部份都入唔到去的，呢一點或者會令部份玩家失望。至於其他畫質表現就中規中距，不至於令人驚艷，但總算細緻，偶爾會有富有 Ubi 特色嘅 Bug，但係 Overall 唔算影響遊戲體驗。

特別係 2020 年大家都無得外遊，藉著遊戲返 London 走馬看花行個圈，勉勉強強止住「好想去旅行」條癮都好嘅。不得不提遊戲中嘅配音，唔同國藉嘅 NPC 都有唔同口音（英國・美國・印度等），呢一點幾細心。

同上集一樣，今集《Watch Dogs Legion》一樣有多人遊玩功能（4 人 Co-op），PS4／Xbox One／PC 版已於 2020 年 10 月 29 日上市，Xbox Series X｜S 版於 11 月 10 日上市；PS5 版於 11 月 12 日上市。目前已知 Xbox One 版本可以直接將遊戲並繼承至 Xbox Series X。