如果你係極重道德觀念嘅話，呢隻 Game 你可以當冇睇過，事關呢隻由獨立遊戲製作公司  Fire Cycle Games 所製嘅呢隻《Human Factory》，唔係搞個「血汗工廠」出嚟咁簡單，所以以下內容可能會引起情緒不安，請大家小心使用！

玩家喺《Human Factory》入面係一個全能嘅宇宙神，無聊無野做嘅時候發現地球人好好有趣，結果就不如試下用 Printer (?) 整啲「人」嚟玩下，奴役下佢地兼睇下會唔會做到「自給自足」，最後養得健健康康肥肥白白再拎出去賣錢，這不是一個賺錢的好方式嗎！

正經講的話《Human Factory》只係一隻模擬經營嘅策略遊戲，遊戲畫面睇落可愛得意，但實際內容 Cult 到不能，而且啲詳細內容都唔太適合喺度分享，總之你有可能製造出藥包、腸、心等等嘅「產品」。而你喺遊戲中會遇到其他「神」嘅要求，達成目標賺夠錢就可以開發其他生產工具，進一步改良產品質素。成隻 Game 唔覺唔覺可以玩幾個鐘，如果純粹試玩嘅朋友就要特別注意！

《Human Factory》已經喺 Steam 平台發售，呢啲主題咁具爭議性嘅 Game 唔知擺得幾耐，想玩嘅要快手啦。