《刺客教條：維京紀元（Assassin’s Creed Valhalla）》（下稱《維京》）已經係《刺客》正傳嘅第十二部作品，今集 Ubisoft 再一次將玩家帶到遙遠嘅歷史時空。玩家將扮演維京軍事領袖 Eivor，帶領族人由挪威飄洋過海，到達英格蘭建立新嘅聚居地。本身「維京人」比人嘅印象就係「戰士」、「粗獷野蠻人」，同食腦嘅刺客好似九唔搭八咁；但係試玩後，發現 Ubisoft 將二者融匯貫通，令人喜出望外。

男主角造型係咪有啲似《水行俠》Jason Momoa 嗰種粗獷型男先！

今次我地得到 Ubisoft 邀請試玩《維京》，作為一個《刺客》系列 Fans，手掣一拎上手，就感受到戰鬥與前作嘅分別。上集攻擊主要分為「輕攻」「重攻」嘅組合；今次則變成左右手各自有獨立武器設定，操控方式亦有針對戰鬥進行調整，加強單對單戰鬥時嘅壓逼感。

大家睇官方預告或者試玩片段時，相信眼利嘅朋友都會留意到，玩家多左一條氣力計，進行回避、加速等動作都會扣體力，呢個設定常見於其他動作遊戲，但係於《刺客》系列黎講就係一個新元素。

一輪試玩過後，先同大家分享各種遊玩新感受，首先主角性別可隨時切換，喺「維京人」嘅年代，居然可以用女性身份橫行江湖，呢個設定的確頗有趣味。

其次，《維京》除咗新增氣力計設定，今集遊戲並無等級限制，玩家於遊戲裡面完成任務或達成條件，就會獲得技能點數，從而學到更多能力。

「技能樹」以星座圖去表示，整體與前作未算有太大分別，主要分為近戰、遠程、暗殺三個項目。每個項目可以比玩家選擇適合自己嘅戰鬥風格，而風格並不影響技能點設置，玩家可以按需要更改技能點分佈。

例如試玩期間，我曾雙手各執一件重型武器、以「狂戰士」風格出發，方便清理雜兵，但去到 Boss 戰，就因攻速問題不斷捱打，結果我需要即時重點轉學格擋，持盾反擊先能夠獲勝。

順帶一提，「盾」可以作為主手武器使用，相信遊戲推出之後，會有好多美國隊長出現！

冇左等級限制，面對強敵嘅時候，只要先用「弓」對敵人進行弱點攻擊，就可令對方氣力計下降而暈倒，玩家從而接續發動強力嘅「踩踏技」或者「處決技」，去令敵人受到極高傷害或直接擊倒。

玩家 HP 值唔會再如舊作一樣，一離開戰場後就自動回復，今集玩家需要使用「軍糧」作為回復藥。「軍糧」除左可以喺雜貨店補給，玩家喺唔滿血嘅狀況之下，於地圖上亦可以執到「軍糧」直接補血。

為左強化玩家一行人嘅資源，《維京》加入左一個「劫掠」嘅元素，只要玩家去到其他勢力嘅領地村落，就可以發動「劫掠」去搶奪當地嘅資源，升級自己嘅「聚落」。

戰鬥模式有所不同，是否代表《維京》就會無咗陣「刺客」味呢？遊戲裡面，過往在探索或尋敵過程經常用到嘅「獵鷹」同「鷹眼系統」變成「烏鴉」同「奧丁視覺」，不再與前作一樣隔牆鎖定敵人位置，增加暗殺行動嘅緊張感；而服裝上嘅「兜帽」再次派上用場，因為玩家於其他城鎮進行任務時，戴上「兜帽」的確會降低被敵人發現嘅風險。

系列作中固有嘅探索要素、小遊戲則依然存在。探索過程嘅謎題頗具挑戰性、而爬塔開視覺、賭檔賺錢呢啲就梗啦，好似舊作中以 Parkour 追白鴿、信紙、詩句等嘅收集要素，《維京》入面就變成「紋身設計圖」，之後去到理髮店改變造型嘅時候，仲可以紋返上身，型棍子，唔再一味得個儲字。

小遊戲中有一個「對聯 Battle」，即係類似電影《唐伯虎點秋香》入面唐伯虎同對穿祥玩嗰種，玩家聽完對方出題，然後會出現三個選項；於選項中揀出「對得工整，又羞辱到對方」就為之贏勝出，贏左之後會提升魅力值（！！！！），有助於劇情裡面所有「談判」環節。

上面提到談判，《維京》中玩家同其他角色喺劇情上嘅互動，直頭可以話喺成個《刺客》系列最飛躍性嘅進步。試玩其中一個任務入面，玩家需要說服一個傭兵團去參戰，過程中，對方向你提出要收返你＄520 酬金，而你可以作出以下三個選擇：

1）應對方要求交 ＄520

2）講價，說服對方收半價（呢個選項係需要有足夠魅力值）

3）一蚊都唔會比

結果我地選擇左比一半，完結左劇情之後，玩家可以喺對方身上偷返啲錢（！），個 NPC 仲會出兵幫你完成任務！不過最終佢會發現你偷左佢錢，之後會於路上遇到佢伏擊你報仇，件事都幾人性化。

最後做個試玩後總結，《維京》想於遊戲裡面同時做到「戰鬥」同「暗殺」兩種戰鬥樂趣，戰鬥狠而快，唔同武器都有獨特終結技；謎題難度提昇，道具收集用途增加，以及多元化劇情選項，相信都係今集《維京》嘅樂趣，例如我自己就幾期待主角同北歐神話人物嘅互動情節。到底玩家有幾享受以上嘅新嘗試？正式版推出後，歡迎大家來文同我地做個分享。

《刺客教條：維京紀元》將於 2020 年 11 月 10 日上市，對應平台為 Xbox One、PlayStation 4、Windows PC（Epic Games Store & Ubisoft Store）。