講到 Cyberpunk  相信大家都等緊下個月隻《Cyberpunk 2077》，距離推出時間仲有成個月，不如試下另一款 Cyberpunk 作品準備下先。開發時間長達 12 年嘅獨立作品《G String》，終於喺日前推出，短短幾日已經得到「極度好評」評價，足證品質上乘。

《G String》係一款動作冒險射擊遊戲，採用第一身視點。最初作者因為受到《Space Odyssey》、《Matrix》等作品啟發而製作，最早期只係《Half-Life 2》入面一個 MOD，不過經過多年開發，現時已成為一隻獨立作品，並且全部由 Eyaura 獨力製作。今次 Steam 上架嘅《G String》所有素材都係重新製作，但係唔好期待畫面會好精美，以獨立遊戲黎講叫做勉強可接受，未到難受水平。

遊戲中玩家扮演一名韓國少女 Myo Hyori，身穿生物防護服，具備強大嘅運動能力。同大部份遊戲一樣，都係要搵補品、彈藥幫助戰鬥，但係啲細致嘅部份加入 Cyberpunk 元素，例如衝刺或快速呼吸時防護服會發光、空氣過濾器可透過運動或陽光充電等等，整體動作表現流暢，爽感係有嘅。

《G String》已於 10 月 17 日上市，對應平台為 PC Steam。