雖然本人係一名嗜血玩家，但久唔久都會玩下啲休閒類遊戲洗滌心靈。舊年喺 Steam 就推出一隻放鬆治癒系休閒遊戲《A Short Hike》，直到現時仍然係「壓倒性好評」評價，較早前仲出埋 Switch 版，可惜嘅係香港並無任何相關報導，如果你都想靜下放鬆下，不妨試下。

《A Short Hike》由 Adam Robinson-Yu 獨力開發，係一款放鬆治癒系休閒遊戲，採用開放世界。故事講述主角 Claire 因為生活上遇上挫折感到悶悶不樂，睇見呢個情況嘅姨姨就決定帶佢去上山散心。但上到去之後發現電話收唔到訊號，於是 Claire 就再向山頂進發，尋找收到電話訊號同時驚覺眼前風景嘅美好，就此展開一段小小嘅旅程。

如果只計主線流程，我諗大約 30 分鐘就爆到機，不過呢隻遊戲唔係要你玩 Speedrun，而係幫你調整、放慢心理狀態得到休息嘅效果。講到明係開放世界，當然可以四處探索，玩家所扮演嘅角色係一隻雀黎，可以自由自在地於天空翱翔。地圖雖然唔係話好大，但係由上至下設計，整個世界有高低差概念，當玩家於高處滑翔飛行時會有意想不到嘅效果。另外旅程中會遇上其他動物，對話令人感到溫暖亦會令人會心微笑，當然仲有好多小遊戲、執貝殼、釣魚、挖洞等要素，再唔係齋睇風景或者周圍飛都會令你心情舒適，不論大人細路都啱玩。

《A Short Hike》已經推出，對應平台為 Nintendo Switch 及 PC Steam。