萬眾期待嘅《真·女神轉生V》要 2021 年先推出，不過今個月尾都有隻《真・女神轉生III NOCTURNE HD REMASTER》止下渴。今時今日《真女》系列絕對係日系 RPG 食物鏈最上層果堆（可與 FF、DQ 相提並論） ，但其實初代推出時已經創作出劃時代嘅系統，奠定後來遊戲系統基礎，極具前瞻性。

月尾出《真・女神轉生III NOCTURNE HD REMASTER》，非常適合新手落坑

今時今日《女神異聞錄》同《真·女神轉生》系列廣為人知，但其實初代嘅《真·女》並無「真」字，就咁叫做《女神轉生》（デジタル・デビル物語 女神転生），不過當年我都無接觸過，都係大個之後用「特別嘅方法」玩返，而我第一隻接觸嘅《真·女》已經係超任年代嘅《真·女神轉生》。

《真·女神轉生》框架源自於舊版《女神轉生》

當年大家入手新 Game 嘅方式同而家有啲唔同，除咗買原裝盒帶之外，當年嘅超級任天堂流行「抄碟」，對無經歷過果個年代嘅朋友可能難以想象。果陣時賣遊戲機嘅商場，每間舖都會有本 File，上面會跟遊戲容量大少完整列出所有遊戲名單，大家就跟住呢個名單去「抄碟」。當時遊戲資訊缺乏，好多時都係聽老闆推薦或者一口氣買 10 個連冧把遊戲返去慢慢試，因為次次都係一堆堆咁買，所以成日有未試真就棄 Game 情況出現。而家諗返真係要多謝老闆，因為果陣佢極力推薦我先認識《真·女》。

仲記得初接觸《真·女神轉生》時，係非常震撼的。RPG 係當時皇道遊戲種類，《FF》系列、《DQ》系列、《伊蘇》系列等等，各有自己特色，但《真·女神轉生》中嘅「溝」惡魔元素成功地令佢建立自己獨特嘅市場地位。當時 RPG 遊戲已經有晒現今常見嘅元素，即係升 LV 學技轉職召喚獸呢類野，但係《真·女》放棄呢條皇道公式，以「同惡魔溝通」為核心，為廣大玩家展示 RPG 遊戲嘅新方向（充滿「魅力」嘅惡魔設計係另一大賣點）。

「仲魔」系統喺當時係非常新穎嘅設計，與惡魔交涉、合成強化亦都成為《真·女》及衍生作品嘅核心基礎系統。（圖為真女II）

遊戲中玩家可以與對戰中嘅惡魔進行對話交涉，對話開始前先要選擇「友好的」或「威壓的」態度，然後再喺之後嘅對答選擇答案，如果達成要求該惡魔會加入成為「仲魔」，而仲魔可透過反覆合成強化。要收集仲魔，就要對佢地有所了解，每隻惡魔都會有 Law / Chaos 以及 Light / Dark 二組獨立屬性，Law 代表法則與秩序、Chaos 代表自由與混沌，Light 象徵光明建設、Dark 象徵黑暗破壞，而喺中間存在代表中性嘅 Neutral，二組屬性互相獨立。

世界毀滅、重生，Law、Chaos、Neutral 差唔多係《真·女》系列嘅標準設定

主角同樣有 Law / Chaos屬性，當擊敗特定敵人或選擇部份選項會有所改變。主角屬性改變不但會令你無法收屬性相剋惡魔為仲魔，仲會影響劇情甚至 Final Boss 對決，喺當年呢個設計令人非常著迷。要知道當時資訊流通度極低，又不諳日語，所有惡魔對話都係「靠估」，每次收到仲魔都極有成功感，然後就變成每日返學同學間吹水 Showoff 日常話題。仲記得有次閒談間，講到大家打隻 Final Boss 唔一樣，果下直頭覺得自己發現新大陸。不過當年到最後都唔知點行另一條路線頗感遺憾，好在後來有台版書仔攻略本解決呢個問題，亦都好感謝《真·女》為我帶黎美好嘅童年。

當年睇唔明日文，但係堆惡魔造型太正，齋吹啲怪有幾勁已經係同學間每日嘅話題

《真·女》帶我進入新領域，後來推出嘅《真·女 II》、《if》自然吸引我繼續玩，系統大致同前作相同，但係《if》屬於外傳，以高中為舞台，亦都因為呢代嘅成功令到《女神異聞錄》誕生，呢個又係另一個故事了。到後來《真·女 III》推出，雖然仲魔系統同前作差唔多，但係戰鬥模式變為消耗行動值並加入打中「弱點」減少消耗量設定，即係可以多次行動，爽快度大增。

《真·女 III》因為系統轉變，遊戲節奏變得快速，玩起黎更刺激（圖為真・女神轉生III NOCTURNE HD REMASTER）

利申：當年《真·女 III》我係玩唔完的。喺《女神》系列只要人類角色死亡 = Game Over，《真·女 III》只有主角係人，基本上一死就完，加上無得隨時 Save，好多時玩完一段時間唔小心就死咗，搞到我無心機玩落去。好在黎緊會出《真・女神轉生III NOCTURNE HD REMASTER》，由於《真·女 III》不論劇情同人物設定都同 I、II 代無關，非常適合新入坑朋友，加上有中文睇得明講乜，真係無藉口唔玩。

今次真女III Remaster 有中文有得揀難度，真心非常感動

《真·女 III》之後嘅四代相隔九年後推出，對應平台為任天堂 3DS。雖然由家用機平台變為手提機，但無影響遊戲質素，得到《Fami通》等媒體高分評價。不過當年因為忙於工作，連後面推出嘅《真·女 IV Final》都無玩，好在部 3DS 仲行得郁，希望喺五代推出之前有時間玩返。

回顧返整個系列，真正可以話陪伴我成長。個人對 RPG 喜好比較特別，特別有愛嘅作品唔多，有《FF V》、《DQ III》、《幻想水滸傳》、《光明與黑暗》同埋《真女神轉生》系列，但當中最有意思都係《真女神轉生》系列。佢不但開闢自己嘅系列風格，製造出獨有世界觀，同時又有《女神異聞錄》以及相關音樂遊戲，你係見得到一個品牌不停與時並進。所以即使黎緊嘅《真·女 III》重製定係《真·女 V》我都係充滿期待，我期待嘅並唔係今集故事點發展、系統點美化，而係期待佢話比我聽到底 2021 年嘅 RPG 標準到底係咩。