《Frostpunk》呢隻入選過我地 2019 十大推薦遊戲之一嘅建設策略類電腦遊戲，如果你係呢隻遊戲嘅 Fans 的話，你要留意住啦！事關《Frostpunk: The Board Game》呢個官方授權桌遊版已經喺 Kickstarter 平台開始眾籌，開始後唔夠一個鐘就迅間成功達標，依家就只係睇製作方嘅 Stretch Goals (延伸目標) 有啲咩驚喜比 Fans 啦！

玩過《Frostpunk》的話都知道個遊戲故事背景係講全世界冰封，人類於北極建造「能量塔」抵禦寒冷，重建人類居住地。遊戲嘅設定同流程都非常高策略性，不過只提供單人遊玩。而《Frostpunk: The Board Game》呢個桌遊版本同電腦版大致上都相同，除左不斷探索同生產資源去維生，同時亦要於人性同生存之間制定律法，去保持成個居住地嘅安穩去成為人類最後聚居地嘅領導者。

《Frostpunk: The Board Game》比起《Frostpunk》出色嘅係佢最多支援 4 人同時遊玩，當然你自己一個開局單人遊玩亦都可以。

• 三人合作嘅設置方式

• 四人合作嘅設置方式

《Frostpunk: The Board Game》共有兩個版本，分別係 75 歐羅 (約港幣 $685) 嘅普通版以及 125 歐羅 (約港幣 $1141) 嘅豪華版。依家喺 Kickstarter 眾籌預購任何一個版本，仲可以免費得到 Frostlander Expansion 擴充包，以及預先可以為你嘅「能量塔」以及建築模型免費噴埋陰影。

對《Frostpunk: The Board Game》有興趣嘅玩家們，仲唔快啲去佢嘅下面嘅 Kickstarter 預購啦！