獨立遊戲公司 Kinetic Games 製作， 4 人合作第一身驚慄遊戲《Phasmophobia》，已經喺 Steam 平台上架！佢呢隻 Game 勁就勁在一句講晒「《Payday》靈異化」。

《Phasmophobia》遊戲入面有十幾款鬼魂，每次遊戲都會隨機決定鬧鬼位置以及鬼魂種類，玩家就要靠你手上嘅道具去搵到相關線索，以確定現場出現嘅係邊類鬼魂鬧事為最終目的。遊戲嘅氣氛就一流，不過唔好對啲「鬼」嘅造型要求太高，申手不見五指嘅情況下，無啦啦彈出嚟喺你面前嚇一嚇就點都有嘅。

而且每次遊戲中有不同嘅達成條件，只要玩家完成部份，就算最終「捉錯鬼」都係會收到相應嘅報酬。得到報酬後，就可以買更多嘅道具同裝備。有啲道具仲會對應語音功能，即係話玩家電腦有配置 Mic 或者 Headset ，當玩家對住某啲道具講野，可能會聽到一啲意想不到嘅「回應」。

《Phasmophobia》呢隻 Game 已經喺 Steam 度得到極多玩家好評，而且仲有繁體中文，不過就未有任何移植其他平台嘅消息。今個十月冇左「哈囉喂」，約埋一班朋友嚟個網上捉鬼團都歡樂啊！