Capcom 喺 25 日晚上直播節目「CAPCOM SPECIAL PROGRAM」，由《Monster Hunter》系列製作辻本良三以及《Monster Hunter Rise》總監一賴泰範為大家介紹新作系統「翔蟲」。當然仲有 TGS 版最新影片，介紹隨從艾路貓、加爾克以及部份新動作。

辻本良三先講解今集嘅副題「Rise」，意思係代表新系統「翔蟲」賦予獵人高移動性，以及同世界各地玩家同遊嘅想法。今集最重點系統「翔蟲」將幫助玩家飛越各種地形障礙，快速到達目標區域，同時亦可用於地面加速移動。另外「翔蟲」亦可於戰鬥中使用，喺影片入面我地就見到各種「翔蟲」衍生動作，亦有空中放大爆彈新動作，不過就未知會否沿用 MHXX 系列嘅「Style」，呢點要留待之後確認。

《Monster Hunter Rise》將有艾路貓以及新隨從「加爾克」供玩家自由選擇，後者可以騎乘移動，騎乘中可使用部份道具，亦會發動攻擊。之後仲有介紹新據點「神火村」，都係有野賣有裝整咁啦，無乜特別。不過成條片最最最令人驚訝嘅地方係今次獵人終於識講野！！！媽咪好感動丫！！

《Monster Hunter Rise》將於 9 月 26 日萬上 8 時，進行世界首次實機試玩直播，當然繼續由辻本良三同埋一賴泰範為大家示範，記得準時睇啦。