Square Enix 於 9 月 17 日舉行嘅「PLAYSTATION 5 SHOWCASE」上公佈全新遊戲《FINAL FANTASY XVI（ファイナルファンタジー16）》，目前對應平台為 PS5，預計 2021 年會有進一步公佈。

《FF16》由大獲好評嘅線上遊戲《FF14》總監吉田直樹擔任製作人，而首條公佈嘅影片當中，可以見到今次嘅世界觀頗有中世紀時期嘅味道，而畫面、戰鬥、召喚獸等等都極為華麗，目前故事內容及戰鬥細節尚未公佈，但係相信呢條影片將會成為 PS5 嘅必玩之作。

吉田直樹先生表示，剛剛開始《FF16》項目時，工作室得好少員工，所以遊戲嘅基底絕對係工作室努力不懈累積返黎嘅成果；而擔任 Directer 嘅髙井浩則笑言，自己於《FF1》推出時仲係學生，去到《FF5》時正式加入公司，有份做小助手，後來去到《FF14》自己可以負責更重要嘅項目，所以今次黎到《FF16》自己一定會盡全力製作遊戲，希望帶比玩家至高嘅遊戲感受。

至於坊間一直有傳《FF16》會落埋 PC，呢一點我地暫時未能證實，而 Square Enix 發言人表示，公司目前未有將《FF16》擺去其他平台嘅計劃（“We have no further information on if Final Fantasy XVI will be released on platforms other than the PS5.”；來源 IGN）。假如遊戲平台有所增加，我地將會再同大家報導。