今次為大家介紹一隻台灣製作遊戲，雖然尚未發售，但係已經成功進入 Steam 全球百大願望清單，真係非常利害。遊戲耗時三年開發，叫做《守夜人：長夜》（Vigil: The Longest Night），預計喺下個月推出，睇片遊戲質素唔錯，絕對值得支持。

《守夜人：長夜》由台灣獨立遊戲團隊玻璃心工作室開發，屬於平面橫向捲軸動作遊戲。玩家於遊戲中扮演「守夜人」蕾拉，從盤據田野嘅詭異邪惡生物中拯救佢嘅家鄉「梅耶鎮」，並最終揭開永夜嘅秘密。蕾拉擁有長劍、雙刀、大劍及弓箭四種武器，搭合法術與各種怪物戰鬥。當然一般橫向動作遊戲搜尋道具、破解機關、打 Boss 等元素亦都一應俱全。

《守夜人：長夜》以克蘇魯風格融合台灣文化，再配以中式傳統剪紙藝術展現獨特視覺風格。製作團隊亦坦言受到《惡魔城》、《Salt and Sanctuary》等經典遊戲啟發，會以困難且精美嘅關卡及戰鬥持續挑戰玩家，又有多種結局，令玩家有目標地進行多週目。遊戲亦都會提供三種難度，不論係動作遊戲新手定高手都會玩得開心。

《守夜人：長夜》（Vigil: The Longest Night）預計於 10 月 15 日上市，對應平台為 Nintendo Switch 及 PC Steam。