香港最常見嘅地產商除咗果幾間大行之外，有間主要從事舊樓購併，叫「玄牛」嘅都好出名（而家改咗名啦）。呢間「玄牛」出名嘅地方係佢地收購舊樓嘅方式，傳聞話掛「鬼」相喺人地屋企對面、放火等等手段都係佢地嘅看家本領，為嘅都係逼人走同埋「質」低樓價，再以賤價收購。勢估唔到，黎緊竟然有隻痴線 Game 《Sketchy House Flipper》，主軸都係要你搞破壞「質」低樓價，即刻覺得隻 Game 勁本土。

《Sketchy House Flipper》由 Kirt Olson 開發，係一款休閒模擬遊戲，獨立製作。遊戲背景講述一對名人夫婦，佢地經常都會搵新樓盤，以賤價購入後翻新再出售，賺取巨額利潤。為咗以超平價買入樓盤，於是就要做「Dirty Work」令樓價變低，但礙於名人身份不便做呢啲野，所以就騁請你去做呢啲野。

做得衰野就梗係唔想人見到，所以遊戲玩法都係要你用潛入嘅方式搞破壞。玩家可以由後門、車庫等地方潛入，如果搵到鎖匙的話就可以去更多嘅地方。另外每間目標房屋都會有任務清單（例如拆人馬桶搞到水浸），必需按照老闆嘅指示進行破壞。不過要注意屋內係有人的，可以靠開電視、收音機等行動分散佢嘅注意力，記住重點係唔好避人發現，同時係不能使用暴力。（如果有得放火落鎖鏈淋油就正，勁有玄牛特色）

《Sketchy House Flipper》預計於今年冬季發售，對應平台為 PC Steam。