西班牙獨立遊戲工作室帶來全新即時戰術遊戲（RTT）《The Stone Of Madness》，遊戲將由 Merge Games 發行，預計對應 PC、PS5 及 XBox Series X，計劃於 2021 年春季上架。

《The Stone of Madness》發生於 18 世紀後期，以西班牙庇里牛斯山（Los Pirineos）上面一間天主教耶穌會修道院作為故事舞台。修道院實際上為當時嘅精神病院以及監獄，而被困當中嘅主角們，因為飽受精神病困擾、同時難抵院中遭受到嘅殘酷對待，所以決心逃離此地以獲取自由。

遊戲採用俯瞰式視點，而修道院裡面嘅地圖及擺設係半自動生成的，會隨住玩家每次進行新遊戲而有所變化。玩家可於遊戲類面隨時切換使用五個角色，亦可以利用院內設施去排除敵人、或者自製道具與 NPC 交換，最終目標為利用角色各自嘅能力，合力避開耳目，逃出生天。

《The Stone of Madness》工作室明言係受左《Desperados 3》《Commandos》等遊戲啟發，但係佢地唔單止想做一隻即時動作戰略，仲想喺入面加入少許恐怖元素，因為先會起用「中古修道院」以及「精神病患」作為題材。

因此，遊戲當中五位主角分別都有唔同種類嘅精神心理疾病，隨住劇本推進，角色會因為精神負荷過重，而累積「Stone of Madness（瘋狂之石）」，從而產生更嚴重嘅精神疾病，例如係妄想症、暴力傾向或者認知障礙等等。

所以，除左專心逃亡，玩家亦需耍於遊戲中收集「Stones of Clarity（明晰之石）」，因為呢啲石頭可以幫助角色們回復正常。點樣控制角色嘅精神狀態、同時要佢地互相合作逃亡，呢個將會係遊戲比玩家嘅一大難題。

遊戲中仲有時間流動、日夜嘅分別。日間進行逃亡難度較高，但相當安全；晚間角色缺乏休息，同時亦可能會於修道院內遇上未知嘅危險……到底要點樣分配時間行動，就留待大家進行遊戲時好好摸索。

《The Stone Of Madness》預計對應 PC、PS5 及 XBox Series X，計劃於 2021 年春季上架。