【遊戲介紹】新類型音樂式遊戲《Of Bird and Cage》用音樂控制遊戲體驗

今次介紹嘅唔係大家見慣見熟嘅「音 Game」，雖然同樣以音樂做主導，但就係一種新新類型音樂式遊戲黎。《Of Bird and Cage》嘗試用一種新型式，結合音樂同冒險劇情遊戲，令玩家唔係「聽」音樂，而係「進入」音樂嘅世界，睇落好迷？放心，我都係。

《Of Bird and Cage》由 Capricia Productions 製作，係一款沉浸模擬互動音樂遊戲，獨立製作。玩家將會進入一個混合 Metal、音樂同動作嘅奇特遊戲世界。整個遊玩過程中會播放長達 2 小時嘅完整搖滾音樂專輯，而整個遊戲都會同歌曲同步，由音樂控制遊戲體驗，隨著曲目改變，遊戲中音調，故事同功能亦會有所改變。

遊戲故事就以《美女與野獸》改編，根據官方所講呢個係充滿酒精、毒品、幻覺嘅多重結局愛情故事（!?），隨音樂變化發展同環境互動，玩家將親身經歷斯德哥爾摩綜合症，睇住女主角逃脫被捕時身心受到嘅障礙。另外以音樂為主的話，音樂班底自然係非常重要一環，合作單位有 Ron “Bumblefoot” Thal（前 Guns N’ Roses 成員）、Rob van der Loo（Epica）、Ruud Jolie（Within Temptation）、Rocky Grey（前 Evanescence 成員）、Mike Lepond（Symphony X）等等，都幾強勁。