宮崎駿大師嘅作品《天空之城》相信大家都有睇過，記得電影開頭有一段係講人類曾經以高科技創造飛行城市「Laputa」，而呢個城市曾經非常繁榮，有好多人居住於此。老實講，呢個構想非常有魅力，亦都相信有唔少朋友細細個就嚮往「天空之城」呢個地方。等咗咁多年，終於有機會體驗「天空之城」啦，因為今年推出嘅遊戲《Airborne Kingdom》就係要建設一座屬於你嘅「天空之城」。

《Airborne Kingdom》由獨立遊戲團隊 The Wandering Band 開發，係一款策略模擬城鎮建造遊戲。基本玩法同一般城市建設遊戲差唔多，都係建造房屋、收集食物、滿足居民需求、擴展城市規模等等，不過由於你嘅城市係處於天空中，所以仲要兼顧城市嘅燃料，確保唔會「墜城」。另外，玩家擴展城市規模時要注意城市嘅平衡，側埋一邊的話又係有機會「墜城」。

玩家嘅天空之城市會喺隨機生成嘅沙漠中飛行，地上當然會有其他王國或者部落存在。玩家可以同佢地建立關係、交換物資、吸收各地嘅知識及技術，亦可以吸引其他其他王國、部落居民「移民」去你度。不過就唔知有無得行使武力，征服呢啲王國，始終我都想試下唸「天空之城」果段咒語……。

《Airborne Kingdom》預計於 2020 年秋季上市，遺憾嘅係對應平台只有 Epic Games Store，PC 及 Mac 皆可遊玩。