印度神話嘅角色好似梵天、濕婆、毗濕奴，喺唔同嘅遊戲當中，大家都有聽過佢地個名，但真真正正以印度神話做主題嘅遊戲呢就真係唔算多。古語有云「煮印度咖哩，要唱住印度歌先夠風味！」，咁做印度神話主題嘅遊戲，搵返印度班底去做就夠晒正宗啦！

由印度獨立遊戲製作公司 Nodding Heads Games 製作嘅動作冒險遊戲《Raji: An Ancient Epic》，已經率先喺 Nintendo Switch 平台上架，而今年第三季亦會登陸PS4、Xbox One 以及 Steam 平台。

《Raji:An Ancient Epic》受印度兩大史詩《摩訶婆羅多》以及《羅摩衍那》啟發，遊戲故事背景設定喺古印度，講述一千年前神魔大戰之後，惡魔展開計劃反擊，開始入侵人類以及威脅要消滅人類。混亂當中，主角 Raji 嘅細佬 Golu 被惡魔大軍帶走， 而 Raji 被神靈選中賦予神器及能力，成為守護人類嘅捍衛者，擊敗惡魔大軍嘅同時救出被嘅細佬 Golu。

《Raji:An Ancient Epic》成隻遊戲陣古印度風味就十足，玩法同視點角度都同舊《God Of War》非常相似，亦有部份嘅解謎要素喺當中。喺呢排大作就冇乜，想搵啲異國風味，輕輕感受下印度神話神祕而壯麗嘅境界，呢隻《Raji:An Ancient Epic》真係可以一試無仿。