早排出咗一隻 Cyberpunk 風格嘅爬塔射擊遊戲《Danger Scavenger》，雖然係小本製作獨立遊戲，但係質素都幾唔錯。佢俾我嘅感覺係有啲似《Shock Troopers》，又有少少《Alienation》味道，有 Roguelite 元素，射擊感又做得唔錯，見無人講所以就介紹下俾大家。

《Danger Scavenger》（致命遊民復仇者）由 Piotr Wolk 及 Star Drifters 製作，係一款包含 Roguelite 元素嘅爬塔射擊遊戲，採用俯瞰視角。故事講述世界已經被人工智能 A.I.O.N.E. 控制，機械人先係呢個世界嘅主人，一班本身被國家認定只識殺人，被稱為「遊民復仇者」嘅「垃圾」，就諗住反正都無野好輸，不如搏下同機械軍團打，話唔定滿載而歸。至於玩家當然係扮演呢班人啦，穿梭於充滿 Cyberpunk 風格嘅大樓屋頂，同機械軍團大戰。

遊戲有四個角色揀，都係每個人有自己技能同風格，例於隱身、快速射擊等等。另外遊戲中會發現各種強化物品，配合各角色技能將會有唔同嘅體驗。由於係 Roguelite，所以死咗之後都係要由頭黎過，不過大家玩開呢類型遊戲都應該慣架啦。根據官方資料，現時有 5 個版圖、30 多種敵人及 Boss、30 多種武器、50 多種主動及被動物品。

《Danger Scavenger》PC Steam 版已經推出，PS4 / Xbox One / Nintendo Switch 版本預計於 2020 年第四季推出，最大支援四人單機合作遊玩。