【遊戲介紹】骰仔科幻解謎遊戲《The Last Cube》睇落簡單但極考腦力

用骰仔玩嘅遊戲有印象嘅應該要數到 PS 年代嘅《XI [sai]》，當年真係瘋狂沉迷日玩夜玩。黎緊又有一隻用好似骰仔咁嘅正方體玩嘅遊戲《The Last Cube》，同樣睇落簡單但極考腦力，鍾意呢類思考型遊戲嘅朋友留意啦，玩過試玩版的確係幾唔錯！

《The Last Cube》係由獨立團隊 Improx Games 製作，係一款立體科幻解謎遊戲。遊戲玩法非常簡單，只需要控制一舊正方體，穿過各種障礙前往終點就得。講就梗係容易，但實玩落就一啲都唔簡單，因為呢舊正方體係可以「進化」的。

遊戲開始時玩家所控制嘅正方體係六面都空白的，沿路前進就會發現地上有各種發光符號，只要碌上去符號度，接觸果一面就會刻上該符號標記。當得到符號標記後，碌到標記朝上位置時就可以試用對應嘅能力。例如藍色十字標記可以「自轉」、紫色標記可以「傳送」、黃色標記可以「衝刺及破壞」、紅色標記可以進行高低差移動等等。遊戲中並無任何提示，喺咩時候用邊一面拎符號標記，喺咩位用咩能力都係靠自己摸索，就算係試玩版已經感受到難度十足，莫講話正式版有過百關，肯定難到痴線。