大家細路仔果陣無乜資源，喺學校最易入手嘅野自然就係紙同筆，所以同同學仔玩「天下太平」都算係集體回憶。仲記得以前玩「天下太平」果陣，成日好「矛」地自創武器，當中最常見嘅就係坦克。有無諗過如果啲坦克識得自己郁，同敵方對戰會係點？《PAPER TANKS》就幫你將呢樣野實現。

《PAPER TANKS》由獨立開發團隊 CHILL & PLAY 製作，係一款坦克射擊類遊戲，支援多人同遊及連線對戰。遊戲特別之處係戰場係一本筆記簿草稿紙上面，所有坦克、草堆、建築物、血量計都係用原子筆所畫成。但係書枱上嘅間尺、擦膠等文具用返 3D 模組製作，令到紙上嘅戰鬥更具真實性，好正！

雖然戰場係用原子筆所畫成，但唔代表戰鬥部份做得求其。影片中見到，坦克可以進入草堆，並且會隱藏車身，即係話多人對戰時可以玩偷襲殺人一個措手不及！另外遊戲雖然簡單，但都有提供重型、中型、快速三種類型嘅坦克，各自有自己特點，並且可以對坦克進行自定。

遊戲單人模式有 30 關可供遊玩，過關後會有豐富嘅獎勵。玩家亦可以自己製作地圖，可與其他玩家與線上或單機同遊。另外製作團隊已表明會每隔 4 個月推出 DLC，增加各種內容。

《PAPER TANKS》預計於 9 月 17 日上市，對應平台為 PC Steam / Linux / MacOS，支援跨平台連線。