今次又為大家介紹一隻啱啱出嘅小品遊戲《Lynn , The Girl Drawn On Puzzles》，雖然係小品野但係質素唔錯。遊戲使用水墨畫風格，配合東洋童話故事入面嘅妖怪同設定，真正老幼咸宜。有時唔想打打殺殺，想放鬆下嘅時候，呢隻遊戲係一個唔錯嘅選擇。

《Lynn , The Girl Drawn On Puzzles》由韓國獨立研發團隊 DOTORIS 開發，遊戲屬休閒解謎類。遊戲本身係一個被隱藏嘅九尾狐日記以及少女搵消失的九尾狐故事。玩家將扮演引導者，帶領被困於九尾狐畫中嘅少女「琳」，逃離畫中迷宮並搵出回家嘅道路。

遊戲玩法簡單，只要移動或者旋轉方塊就可以令到「琳」移動，當然喺移動前要先規劃路線，避開路上嘅陷阱同怪物。官方公佈現時有 12 個章節及 100 多關，雖然操作方式同規則非常簡單，但解謎則需要唔少時間，亦即係話唔會太快玩完。

《Lynn , The Girl Drawn On Puzzles》已經推出，對應平台為 PC Steam / Android。