平時睇戲睇柯南，成日都會進入兇殺犯罪現場，周圍睇下有無犯人留低嘅線索，然後再推理出邊個係犯人。如果俾機會你試下做返一樣嘅野，你又有無興趣？新遊戲《FBI Agent Simulator》就係玩呢樣野，對解謎推理有興趣嘅玩家要留意啦。

《FBI Agent Simulator》由 President Studio 開發，即係整《I Am Your President》果間公司。遊戲背景係一個充滿住罪惡腐敗嘅城市，玩家所扮演嘅探員就負責謀殺、盜竊、綁架、毒品交易、黑手黨等罪案，簡單講即係包晒所有重案黎做。玩家接報後，就會去到現場進行搜證，有各種基本工具協助執行掃指紋、採集血液樣本、Hack 入現場防盜設備等等，當搞掂晒所有野之後就將證據帶返去實驗室。

睇完證據之後，就要嘗試找尋有無目擊證人，有無睇到兇受容貌，然後再推理犯人嘅背景、原因等等。玩家亦都可以同犯罪嫌疑人扮 FD 套料，又或者直接用測謊機逼供。不過最精彩嘅係萬一推理出錯，唔小心「屈」咗無辜嘅人，但只要「砌」夠料就可以入罪，即係放碌竹入人地背囊呢類手段，真係好真實，好本土！

《FBI Agent Simulator》暫時未有推出時間，對應版本為 PC Steam，有興趣嘅不妨放入 Wishlist 先。