Roguelike 類型遊戲越黎越受歡迎，一般黎講大家對呢類型遊戲嘅印象都係「類惡魔城 Roguelike」，大部份都係橫向捲軸動作遊戲，不過今次介紹嘅遊戲就唔同啦。《Risk of Rain 2》同樣係 Roguelike 類遊戲，但就係一款 3D 動作射擊遊戲黎，而且自舊年搶先體驗後，獲得玩家「壓倒性好評」，足以證明佢係一款好 Game。
《Risk of Rain 2》由 Hopoo Games 製作，屬於一款 Roguelike 動作射擊遊戲，使用第三身視點，支援多人連線。遊戲喺上年進行搶先體驗，直到早幾日先正式上市，並且進行 1.0 更新。遊戲有十多個星球場景，主要玩法都係於隨機地圖關卡前進，沿途 Keep 住殺敵搵道具，最尾挑戰巨型 Boss 咁，死咗就由頭黎過。雖然套路熟口熟面，但係我地介紹得嘅自然有佢好玩之處。
遊戲開始後會隨機地點出生，之後會搵到各種類型嘅強化道具，效果五花八門，有加 10% 爆擊率、有加跑速等等。特別之處係所有嘅強化能力係可以大量疊加的，例如話有個道具係「跳躍次數 +1」，得到之後就變成 2 段跳，再執多一次就會變成 3 段跳，如此類推。又因為遊戲有多個角色選擇，每位角色自然有各自戰鬥風格同專屬技能，有極速清場能力嘅弓箭手，有建造炮塔能力嘅坦等等，結合各種強化能力，有時就會莫名其妙地玩到新玩法。根據官方資料，現時已有過百款強化能力，淨係試唔同能力疊加已經好過癮。
《Risk of Rain 2》係一款 Roguelike 遊戲，就算強化到幾勁都好，死咗就乜都無晒要由頭黎過。不過如果攻略達成特定成就，又或者解開隱藏機關，就有機會 Unlock 新角色。當用新角色進行遊戲時，又會有新嘅強化道具出現，根本就玩極都有新野，何況遊戲支援四人同遊，完全唔會悶。（隻 Game 難度唔得架……）
《Risk of Rain 2》已經推出，對應平台為 PS4 / Xbox One / Nintendo Switch / PC Steam（家用機會於近日更新 1.0 版本）。
VJGamer總編，細細個已經蒲機舖，機齡甚深，熱愛電玩文化。