今次介紹一隻早排出，但係無乜人講嘅遊戲《Mechstermination Force》。呢隻遊戲我地年頭果陣介紹過，由獨立遊戲開發者 Bertil Hörberg 製作。遊戲充滿住經典作品《魂斗羅》嘅影子，再溝埋《汪達與巨像》挑戰巨大 Boss 嘅元素而成，玩落都幾過癮，值得推薦。

《Mechstermination Force》係一款橫向卷軸類型動作射擊遊戲，支援單機雙人合作。遊戲故事就講突然有一日，神秘機械人軍團來襲，人類滅亡之際，最強部隊「Mechstermination Force」挺身而出（即係你），成為人類最後嘅希望。（係咪好老土呢！）

開發者 Bertil Hörberg 坦言，係受到《魂斗羅》同《汪達與巨像》嘅啟發，面對巨大嘅敵人就好似玩《汪達》咁，玩家要把握時機逐步爬上敵人身上，並攻擊其弱點。另外佢亦有受到《Gunstar Heroes》、《斑鳩》同《洛克人》嘅影響，所以先會有呢隻作品。不得不提嘅係本作主題曲，充滿住 70 年代機器人動畫主題曲影子，咁係佢係受到「三一萬能俠」同「鐵甲萬能俠」影響。

呢隻野好有初代《飛龍》味

遊戲中可以升級武器同角色能力，現時有 14 隻 Boss，雖然內容好似有啲少，但其實佢只係賣緊 HKD$62（Steam），老實講絕對對得住呢個價錢啦。《Mechstermination Force》對應平台為 PS4 / Xbox One / Nintendo Switch / PC Steam。