冷兵器互劈遊戲存在一種魔力，特別係多人互毆就更吸引。由曾製作《Dead Island 2》嘅 Sumo Digital 開發，預計下年推出嘅《Hood：Outlaws&Legends》就係一款類似扮演俠盜羅賓漢嘅遊戲，組成四人團隊對抗國家奪取財寶，用冷兵器劈爆對手嘅遊戲。

《Hood：Outlaws&Legends》係一款多人動作角色扮演遊戲，採用第三身視點，以 PvPvE 形式進行。遊戲舞台設定喺一個黑暗殘暴嘅中古世界，呢個地方充斥住來自各地嘅的叛亂分子同惡棍流氓，但不論係邊一方都想打劫高壓政府，奪取寶藏。作為玩家將扮演「Outlaws」團隊嘅一員，做劫富濟貧嘅英雄又或者嗜金貪財嘅非法之徒。

遊戲基本玩法係 PvPvE，玩家需要進攻由 AI 警衛保護嘅地方，進行搶劫，同時亦要與同場另一四人團隊競爭（即同場最多支援八人同遊）。當然要贏有好多方法，利用每個角色獨特技巧同能力，選擇正面交鋒強搶豪奪，或者隱身匿蹤偷取寶藏，悉隨尊便。

《Hood：Outlaws&Legends》預計於 2021 年推出，對應平台為 PS5 /PS4 / Xbox Series X / Xbox One / PC Steam。