《Age of Empires》、《Starcraft》呢類即時戰略遊戲大家都唔會陌生，但無論係邊一款都係主打 PvP（你開電腦 Player 都係 PvP 架……），主打 PvE 嘅即時戰略遊戲就真係唔覺眼。由挪威團隊 Pineleaf Studio 製作嘅《Dwarfheim》，就係主打玩家合作，以 PvE 為遊戲唯一目標，共同作戰生存落去！

《Dwarfheim》係新一代即時戰略遊戲，即係遊戲進行過程係即時進行而唔係使用回合制，最多支援三人連線合作（官方話係世界第一款呢個類型遊戲）。同一般即時戰略遊戲相同，同樣需要做資源採集、基地建造、科技發展等等，不過叫得新一代，點都有唔同。《Dwarfheim》主打多人合作模式，不過就唔係舊有果種 3 vs 3 嘅合作，而係三位玩家共同合作，對抗強大嘅敵對勢力，即係 PvE。

多人遊玩模式中主要玩嘅係「Conquest」，玩家必需同其他二位玩家分工合作，而且同傳統 RTS 嘅分工有具大分別。玩家需要由「建造者」、「礦工」同「戰士」中選擇一種職業，當然每個職業負責嘅野都唔同啦。「建造者」負責建造防禦設施、房屋、農場以及生產負責回復嘅單位。「礦工」就負責收集資源、工廠進行冶煉、建造機械同陷阱，以及炸毀敵方防禦設施及建築物。「戰士」就當然係做戰鬥單位保護城市，同時亦要派部隊出去殺敵拎額外資源。

除咗以上基本分工外，仲有進階嘅合作。要建造更強大嘅單位同建築物，自然就需要更稀有嘅資源，而要得到呢啲資源就需要進入礦山 Agartha。要去 Agartha 採礦自然要派人過去，途中梗係要有軍隊護送，而要挖掘更多資源就要向深處發展以及利用機械幫助，同時又要製作陷阱呢類防禦措施以防敵人襲擊。

「Conquest」模式以外，仲有「Survival」抵抗一波又一波敵人襲擊，鬥長命；「Sandbox」一開始所有建築物同部隊已經解鎖，速食 Mode，同埋單人限定「Skirmish」模式，任君選擇。不過最吸引嘅當然都係三人連線模式「Conquest」。

《Dwarfheim》預計於 2020 年冬季上市，對應平台為 PC Steam。