經典電影《侏羅紀公園》令大家重新體會恐龍嘅恐怖，但係奇怪地咁多年黎極少有遊戲將呢個題材遊戲化，最接近已經係多年前 Capcom 作品《Dino Crisis》。雖然之後出過電影同名遊戲《侏羅紀世界：進化》，但就係經營模擬類遊戲（其實都好玩的，詳情按此）。但玩家其實最想要嘅，係重現電影入面所表達，面對史前猛獸極之無力嘅遊戲，幸好終於有人以呢個題材製作類似嘅遊戲。

《Deathground》由獨立遊戲團隊 Jaw Drop Games 製作，使用 Unreal Engine 4，第一身視點，最大支援三人共同遊玩。遊戲入面玩家將扮演小隊一員，前往「Deathground」入面嘅設施拿取「高價值資源」，但係上到島先發現周圍都滿佈恐龍，玩家就要喺呢個又黑又危機四伏嘅地方完成任務。

遊戲中嘅場景熟口熟面

有睇過《侏羅紀公園》嘅都知道，真係打得嘅得一條友，喺呢個遊戲入面都有類似設定。三位小隊成員各有專屬能力，一位係電子工程師，可以 Hack 電子鎖或者開啟閘門等；一位係哨兵持有動態感應器，可以偵測附近有無恐龍；最後一位就係獵人，應該係唯一一位可使用槍械嘅職業，但都需要三人協力先有機會喺呢個島上生存。

未知之後會唔會有新職

氣氛營造得唔錯

島上恐龍會喺隨機位置出現，另外任務目的地亦都係每次都唔同。根據官方描述，恐龍們對聲音非常敏感又極具侵略性，所以亂開槍的話十幾條命都唔夠死（而且彈藥數量極少，製作道具又會產生聲音）。如果偵測到附近有恐龍的話，盡量尋找有得躲藏嘅地方，避得就避。

咁大隻，點打？

《Deathground》現時處於開發階段，預計 2021 年 9 月上市，同時喺 Kickstarter 進行募資（就達標），有興趣嘅去支持下啦。順帶一提，遊戲支援繁體中文，並且已於 Steam 上架，可以去放落 Wishlist 度先。