《刀劍神域》遊戲系列都出咗好多集，亦都擺到明係「Fans 向」作品。作為 Fans，雖然集集都鬧但係集集都繼續玩，特別係《虛空幻界》推出之後，終於感受到製作團隊想擺脫「Fans 向」之名。新一集《刀劍神域 彼岸遊境》出咗無耐，玩落就發現今次製作團隊放咗好多心機落去，遊玩元素更可謂冠絕全系列，咁到底入唔入得過呢？

《刀劍神域》別名：《桐人與一眾後宮的快樂生活》（人物面相高度還原）

循例都要講一講畫面，人物 3D 模組面相高度還原，但係唔知咩原因表面貼圖材質用「塑料」，搞到角色頭髮、衫望落去好「膠」。不過有趣地，喺遊戲前期多條動畫片段入面，呢個情況又變得頗輕微，真係唔係好明點解有呢個設定。遊戲進入中後期，交代劇情多數用返平面插圖顯示，成件事立即變得舒服晒。另外遊戲場景畫面表現算係一般，唔太靚唔太恐怖咁，反正大家玩刀劍都唔係求畫面架啦，係咪？

遊戲一開始，桐人就有圖中對話，我其實好想答佢：「唔洗太高規格，有 PS4 就得」

畫面質素大約係咁

動畫入面角色表面陣「膠味」去得七七八八

當然唔少得偷工減料嘅部份

遊戲戰鬥系統算係做得幾豐富，基本被動技+裝備附加技能+主動使用技能+各種武器技，加埋有極多種變化，概念係好，但係細節無用心諗。例如被動技有 N 種，但係要裝備先會發揮效果，而裝備欄位就得果 4 格……。武器技能即係戰鬥中使用嘅攻擊技，遊戲中有單手劍、二刀流、雙手劍、鞭、弓等等，各自有專屬技能樹。睇落去好似好過癮，但係主動劍技只係比你 Set 四招……比你學晒所有招都無用。

裝備欄位就得果 4 格，你有十萬招被動都無用啦……（可以自訂外貌及衣服外觀，頂帽係咪好熟口面呢）

建議各位先練「雙手劍」，學識「暗之武器」呢招被動（即係吸血），裝咗之後基本上立於不敗之地

然後到戰鬥部份，不論邊種怪物，如果你好似平時玩動作遊戲咁打的話，我諗小怪都可以 KO 你。遊戲嘅基本戰鬥技巧先要用技能幫怪物累積「Hazard」值，滿咗之後破防令怪物浮空，喺呢個時侯可選擇用空中連技或者打 Down 佢再連，處於空中 / Down 狀態嘅敵人會受到比平時大好多嘅傷害。另外要累積「Hazard」值，就要玩「招駁招」，喺使用技能後，會出現藍光，喺呢個時侯就可以接第二招劍技，一招一招轟落去。

使出劍技後有短暫時間會出現藍光，喺呢個時後就要把握時機按下一招劍技，一招一招轟落去，就會幫怪物累積「Hazard」值。

「Hazard」值滿咗之後，「Break」佢就會令怪物浮空，處於空中 / Down 狀態嘅敵人會受到比平時大好多嘅傷害。

浮空 > Down 過程表現出無重力狀態……

理論上，呢種玩法係好爽的。問題係當你使用嘅武器越多 Hit 數，釋放技能就越慢，如果喺出招前比人打到的話仲會 Cut 招。中後期嘅戰鬥，好多時都會有超過一隻敵人，然後就重覆斬 x N > 儲力出技 > 被打斷 > 斬 x N，真係打到你懷疑人生。

打擊感都幾虛下，不過劍招尚算華麗

戰鬥中除咗自己殺敵之外，亦都可以叫隊友幫手。戰鬥中可以命令隊友使出技能及設定隊友攻擊方針，例於因應情況幫手破防、浮空、補血等等，基本上係要經常切換。問題係萬一你無設定的話，預設 AI 行動九成時間都係幫你用「眼神打氣」，即係企埋一邊得個睇字。同樣要操控多位隊友嘅遊戲例如《Xenoblade 2》甚至係《FF XV》，AI 遠比本作優勝，希望喺之後嘅更新入面得到改善。不過大家玩刀劍都唔係求戰鬥系統架啦，係咪？（最正嘅係以上嘅系統全部都係靠自己摸返黎，遊戲入面嘅教學……你當唔存在啦）

唔 Set 方針技能的話，預設 AI 行動九成時間都係幫你用「眼神打氣」，即係企埋一邊得個睇字

要不停手動落指令叫 AI 出技，如果唔係打到 2046

攻擊以外仲有 Parry 系統，不過敵人攻擊頻率低、成功 Parry 回報低嘅情況下，專心劈好過啦

四人協力技威力強大，如果打 Down 對手之後先用更隨時秒殺對手（可惜招技有少少 Bug，成日會卡住出唔到）

戰鬥系統有極大改善空間，但唔代表呢隻遊戲無可取之處。玩得刀劍，著眼點當然係一眾後宮女角，喺《刀劍神域 彼岸遊境》入面，接近所有女角都可攻略，而攻略方法都幾得意。遊戲中有好多「心心」icon 嘅地方，只要帶同你想攻略嘅女角去到呢啲位置，按正方鍵就可以進入「親密對話」，開始俘虜內心之旅。

先送上福利圖！

喺「親密對話」入面，需要喺三個選項入面揀一個對方喜歡嘅話題，然後不停刷。要知道對方喜歡咩話題方法好簡單，就係揀選項後，下方綠色條「情緒」糟減得極少的話就代表喜歡該話題。以新角「梅蒂娜」為例，佢喜歡嘅話題係「戰爭的話題」。

不停揀「戰爭的話題」就可以快速提升氣氛

大婆喺後面，揀「觀察周遭情況」佢會嬲，好搞笑

表面上係咁簡單，但其實暗藏玄機。談話氣氛上升後，用右冬菇可以拉近距離。當拉近距離後，三個對話亦會變成「凝視對方」呢種更親密嘅動作，最高階更會變成「摸手仔」、「摸頭頭」等動作。隨住好感上升，可以「拖手仔」，然後可以升級做「公主抱」，如果好感度升到最高的話，更可以抱佢返房「陪瞓」（每集嘅重點）！喂，玩刀劍就係要呢啲！（可惜今集無艾基爾）

距離拉到最遠只有三個基本選項，即係最客套 LV

隨住氣氛及關係上升，拉近距離就會變更選項，可以做更親暱行為

好感度升到最高的話，更可以抱佢返房「陪瞓」！

「陪瞓」視角做得仔細，留意隻手仔係拖住對方的！

另外，遊戲入面有大量尋寶元素，有可以得到技能嘅隱藏神像；有強力武器防具嘅寶箱，而且標明係地圖入面，唔洗你搵餐死。不過，雖然有標明地方，但係寶箱、神像多數喺啲非常難到達嘅高地，玩家就要依靠神聖術幫助，慢慢搵路跳上去，都真係幾難搞。

好似「鋼素」可以召喚鐵塊作為踏腳石，不過超級難預位

劇情方面由桐人進入「Underworld」開始，到打完塔之後就係新劇情。一般黎講因為版權所限，IP 作品原創劇情多數都幾「Hea」下，但係《彼岸遊境》主線劇情都算有落心機，特別係去到第二章中期已經開始入戲，好正。至於支線、角色好感任務嘅對話都有落足心機，推薦大家留意下對白，幾過癮。

重點劇情當然有！

角色支線劇情都有心機，呢 Part 講緊團長聊桐人瞞住愛麗斯二條友去浸溫泉……

劇情最令人憤怒 & 還原度最差嘅地方，Administrator 點解有衫！！！

總結

《刀劍神域 彼岸遊境》睇得出製作團隊想做好多嘗試，但係諗得唔夠深入，搞到好似二頭唔到岸。個人覺得最大問題係視角顯示，貼近牆、近距離或者打識飛嘅怪視角會錯晒，必需要改善。另一大問題就係教學極不友善，直頭係趕客 LV，不論戰鬥又或者溝女技巧都需要自己摸索。當然仲有歷代存在嘅問題：任務顯示不明確。

視角問題頗為嚴重，希望之後有 Patch 搞搞佢

撇除以上問題，其實本作喺歷代黎講算係做得唔錯嘅一集。戰鬥系統當你摸熟之後，會發現佢嘅好玩之處（當然仲有好多野可以改進）。劇情部份更加係做得唔錯，特別係以最受歡迎嘅「Alicization War of Underworld」做背景。如果你係 Fans 的話，都幾建議試下《刀劍神域 彼岸遊境》。只要捱過摸索期，都真係好多野玩（釣魚、強化、煮食、尋寶、海量支線），要全清的話起碼玩你個零月。

《刀劍神域 彼岸遊境》現已推出，對應平台為 PS4、Xbox One、PC Steam。據聞現時 PC 版有唔少 Bug，建議大家買 PS4、Xbox One 版本，或者等 Fix 咗先買 Steam 版。