尋晚就收到呢盒屬於 LEGO Super Mario 嘅 Starter Set (佢自己就叫 Starter Course) 71360 Adventures with Mario ，影片開箱就始終唔夠仔細嘅，所以點都同大家做個詳細嘅開箱報告啦！

71360 Adventures with Mario – 231 件 – 香港售價 $499

包裝上圖文並荗有晒指引同隻 Mario 公仔可以有咩基本效果。特別一提，佢係要用兩粒3A電架！

先睇隻 Mario，只要將佢腳底個感應器不同顏色嘅地方(唔一定要 LEGO 磚)、特定板塊，甚至就咁擺佢喺枱面放置Play，都會有不同嘅效果同聲效，表情多多，係得意嘅。

但熄機之後…..成隻 Mario 公仔會變得勁詭異

而且未夠 24 小時，個掣都唔係撳得好多次就已經甩色甩到咁……

製作過程方面，今次嘅 LEGO Super Mario 系列係唔會有製作說明書，所有製作過程同教學都要喺手機或平板電腦下載佢嘅專用 App 先可以睇得到。而暫時喺香港嘅 App Store係冇嘅，要的話就要上去日本 App Store 或 自行上網搵 apk 檔啦。

組件方面，最特別一定係個水管同呢堆全新嘅圓角板件

特別留意佢地嘅底部係有坑位，而並非一塊平板嚟架！

貼紙一張都冇！而個「問號」磚應該會係將來自組場景嘅搶手組件之一

而玩家每完成一個部份，喺app入面都會有「剔號」記錄

唔洗5分鐘，教學場景已經完成。即刻試玩比大家睇睇先！(記得開聲睇啊)

跟 App 入面砌完晒所有場景部份啦

但係你會發現比平時多左好多件淨低，不過唔洗擔心，呢啲係比玩家組合遊戲場景時嘅連接路徑

學返 App 入面組合遊戲場景的話，就變成咁樣啦！

總結

無可否認第一次拎起 71360 Adventures with Mario 隻 Mario 公仔，周圍不停去試佢個顏色同動態感應器嘅反應同效果，感覺係非常新奇、有趣同得意。但以官方嘅指引方式去玩的話，你必雖要將自己嘅心態降到幾歲小朋友嘅思維模式先可以欣賞到佢嘅樂趣。

儘管場景變化有幾多，砌出嚟嘅角色幾特別都好，官方嘅遊玩方式太單調，玩多兩三次你就會開始冇左個新鮮感。而且個手機 App 只係負責製作流程、分數記錄同相片分享，正式發售之後功能會唔會有大更新，咁就要到 8 月 1 號先知道啦。

但如果你係已經決定左會買 71374 Nintendo Entertainment System呢件產品的話，71360 Adventures with Mario 隻 Mario 公仔就會變成 71374 當中嘅效果配件，猶如錦上添花，加定唔加就留返玩家自行決定啦。

最後，以價錢同質素去比較，淨係講佢個顏色感應器都已經物超所值(EV3 一個 Color Sensor都要收你 45.99美金啦)。可惜現時所玩到嘅效果嚟講，我覺得完全浪費左隻 Mario 公仔嘅效果同技術。所以對我嚟講，71360 Adventures with Mario 係絕非等閒之物，而且玩過之後更對 LEGO Super Mario 呢個系列仲有一定嘅期望。