呢二年都出咗好多隻 Roguelike 遊戲（即係要重複死亡、有隨機生成迷宮元素嘅遊戲），不過以平面射擊為主嘅就好似唔太覺眼。今次介紹嘅遊戲《霓虹深淵》（Neon Abyss），就係一款以平面射擊為主嘅遊戲，感覺就好似玩緊魂斗羅溝惡魔城咁，加上遊戲啱啱推出已經得到「極度好評」，梗係要介紹下比大家啦。

《霓虹深淵》（Neon Abyss）係一款Roguelike 遊戲，迷宮隨機生成同埋靠堆屍玩就一定，咁佢又有乜咁特別？喺呢隻遊戲入面，每次進入迷宮都會有全新房間佈置、物品、頭目、特殊規則，最正係連結局都會有新 Version，呢下真係估佢唔到，不過暫時未知有幾多個結局以及引發條件，靠大家去摸索啦。（已知道有 5 隻 Boss）

戰鬥方面，以遠距離射擊為主，有各式各樣槍械，仲可以購買配件改造槍械。另外每次死亡後，玩家都可以用途中得到嘅寶石黎升級技能樹，從而解鎖各種被動技能，而呢啲被動技係能夠相互疊加，同時並無上限限制，真係整隻超人出黎不是夢。解鎖技能外，仲有其他角色可供解鎖，呢啲角色本身天賦有獨得技能，例如有得喺使用二種槍、能夠躲避炸彈等等。

遊戲中仲會得到「蛋」呢樣野，啱啱拎到嘅時侯係並無任何效果，但如果成功孵化令寵物出生的話，就會協助玩家攻擊或者作出支援，而且仲會根據你存活時間進化，要搵隻啱自己嘅真係有排 Farm。最後係遊戲中係有鋼琴演奏、冥想挑戰、舞力比拼呢類 Mini Game，都真係幾多野玩。

《霓虹深淵》（Neon Abyss）已經於 7 月 14 日上市，對應平台為 PS4、Xbox One、Nintendo Switch 及 PC Steam。另外 Steam 版做緊首週優惠，只要喺 7 月 21 日前購買，就會免費 Unlock 2 隻角色比你用，同時亦有提供 Demo 版，有興趣可以試下先再買。