曾開發《Call Of Cthulhu》嘅 Cyanide Studio 將於 2021 年 2 月 4 日推出以人狼為主題嘅動作遊戲《Werewolf: The Apocalypse – Earthblood》，對應 PS4、PS5、Xbox One、Xbox Series X 及 PC（Epic Store）。

《Earthblood》為一隻第三人稱動作遊戲，故事以美國 White Wolf 遊戲公司設定嘅《World of Darkness：Werewolf: The Apocalypse》作為世界觀。

故事以美國西部為舞台，玩家飾演嘅主角「卡哈爾（Cahal）」能夠有人類、狼、巨大化人狼三種形態變化。因為一度力量暴走，卡哈爾遠走他鄉，四處流浪。

劇本講述地球不斷被破壞，不過破壞嘅方式就好有「大自然議題」嘅味道：石油公司「恩德龍（Endron）」效力於邪惡勢力「毀滅精靈渥恩（Wyrm）」，不斷開採地球資源，傷害「大地之母蓋亞」。

同時，佢地嘅行動亦似乎為你嘅族人帶來危險，於是卡哈爾為左「拯救我地嘅家園～～～！」而回到故鄉，開始與呢個人類終極霸權進行抗爭。

相比起戰鬥，玩家仲有一個挑戰，就係點樣控制力量，如果控制唔好，會比力量反噬（但有咩後果目前仲未知）。

三種形態亦有唔同用途，例如「人類」可與他人互動及使用機器；「狼」擅長進行搜尋及隱身，但不擅於戰鬥；「人狼」則有強大破壞力，但使用能力時會積聚憤怒值，如果憤怒值超標，玩家將會暴走，亦無法區分敵人以及盟友。

工作室前一隻於 2019 年推出嘅作品《Call Of Cathlhu 克蘇魯的呼喚》我都有玩過（編輯部感想文按此），作為細廠遊戲出品算係表現不錯，唔知今次整動作遊戲又會否為玩家帶來驚喜？有新消息將再為大家報導。