我地曾經介紹過，以「二足步行貓」、「右勾拳柴犬」呢類網上爆紅嘅「幻獸」為題材嘅《動物之鬪》（Fight of Animals），推出 Nintendo Switch 版本之後再推出手機版本，而且仲係免費下載添，未試過嘅不妨 DL 黎體驗下！

《動物之鬪》（Fight of Animals）係以近年用「錯位拍攝」爆紅幻獸進行一對一嘅格鬥遊戲，登場幻獸有「二足步行貓」、「肌肉狐狸」、「猩猩烏鴉」、「右勾拳柴犬」等等，總數十隻登場動物。不過初始只有「右勾拳柴犬」可供使用，需要透過遊玩「街機模式」解鎖，或者課金。

黎到手機版，原版分為輕、重、特殊鍵嘅攻擊被取消，改以虛擬搖桿配搭 Step 鍵操控。攻擊就淨返普攻、必殺技 1、2、3 同埋超必鍵。操控變得簡單，但係連續技仍然爽快，例如「右勾拳柴犬」可使用普攻 x 3 > S2 > S1 > S3 連技，傷害可觀又華麗。另外超必殺技槽滿咗的話，被攻擊中按超必鍵就可以硬生生爆開對手，重組攻勢。

免費手機版只有「街機模式」（即係正常單機 Mode）；「挑戰模式」（鬥快擊敗極厚血嘅肥海豹）以及「訓練模式」，係無「對戰模式」的。所以如果想同朋友隻抽的話，就要買返 Nintendo Switch 或者 PC Steam 版本。

《動物之鬪》手機版已經推出，只要喺 App Store / Google Play Search「動物之鬪-Solo Edition 」就搵到，順帶一提 PC Steam 版本做緊 8 折優惠。

回帶相關文章：

【遊戲新聞】搞笑動物格鬥遊戲 《動物之鬪》追加新角色NS版發表