年尾最令人期待嘅大作《Cyberpunk 2077》，由九月延期到十一月，雖然唔知實際上因為咩原因而 Delay，但係玩家們都期待作品以更完美、更豐富嘅狀態上市。不過早前 CD Projekt Red 遊戲關卡設計師 Max Pears，接受外媒 Gamereactor 訪問時就透露，好多原有計劃已經改變，部份之前實機遊玩片段中嘅動作系統更被刪除。

喺 2018 年嘅 E3 上面，CD Projekt Red 曾經公開一條接近 50 分鍾嘅實機遊玩影片，當時展示咗戰鬥、改造系統，以及部份劇情。不過早前訪問中 Max Pears 就透露因為設計上嘅問題，所以遊戲作出唔少改動，例如槍械選擇更為豐富，並分為「Power」、「Smart」、「Tech」三大種類，另外所有動作將以第一身視點進行。

至於被刪除嘅「跑牆」系統，沿於上述所提及嘅影片大約 42 分 50 秒片段。片中角色裝備機械螳螂刀，沿牆身跑步到達敵人頭頂後，再以手中雙刀固定自身於牆上並作出攻擊。不過本系統以被刪除，但 Max 有補充話「移動方式仍然會有很大的靈活性」，相信係指曾展示過嘅「滑壘」、「掩體移動」等方式。

《Cyberpunk 2077》預計於 2020 年 11 月 19 日推出，對應平台為 PlayStation 4 / Xbox Series X / Xbox One / Google Stadia / PC。