解謎冒險遊戲大家年中都玩唔少，大多數都係穿梳各地區遊玩咁，而且比你探索嘅區域都係 Set 好晒無得變。如果同你講，黎緊有一款新遊戲可以重組手上嘅地圖，令探索區域產生改變，你有無興趣試下？由台灣獨立製作團隊 Sunhead Games 開發嘅《Carto》，就係以一隻以重組地圖為主嘅遊戲。

《Carto》採用手繪畫風，係一款解謎冒險遊戲。故事描述主角 Carto 手持地圖，喺充滿奇想國度探索，發掘隱藏於世界之中嘅秘密。遊戲中玩家會遇見各種角色，並且協助佢地解決問題。解決問題嘅方式當然就係解謎，而要解開謎題就靠本作獨特嘅遊戲機制「重組地圖」，透過重組地圖改變世界樣貌並解開謎題。

例如當你去到地圖盡頭，只要打開地圖，好似拼圖咁移動、旋轉再接合，實際地形就會發生變化。通過呢個機制，你可以不停操作並發現新世界、與人互動、解決問題並找到所需資源等等。

《Carto》於 2020 年 10 月 27 日發售，對應平台為 Xbox One｜Series X｜S（Xbox Game Pass 對應）、PlayStation 4・PC Steam。