《異度神劍 終極版》為 2010 年 Wii 遊戲《異度神劍》嘅復刻版，由任天堂旗下子公司 Monolith Soft 開發，於 2020 年 5 月 29 日正式登錄 Switch 平台。我當年無緣暢玩原版，係玩完《Xenoblade 2》而家先至回頭玩第一代嘅新玩家。
《異度神劍終極版》對我黎講，絕對係一隻質素上乘嘅 JRPG 作品。不過，喺讚之前，講左遊戲中最多人討論嘅「缺點」先。
我見到台灣唔少網友討論遊戲畫質「點解高清完都仲係咁」（笑）雖然我知道《Xenoblade》嘅重點並唔係喺畫質上面，不過，話哂任天堂將隻遊戲 Upgrade 完先至拎出黎賣，相信大家唔會 Expect 個遊戲畫面都仲係充滿住古早味。
不過，正如頭先我所講，《Xenoblade》嘅重點並唔係喺畫質上面，只係遊戲世界觀宏大而美麗，假如畫面做得更靚，一定會更加完美。就算而家畫質有少少扣分，我都仲係非常享受遊玩《異》嘅過程。
《Xenoblade》嘅劇本其實非常王道 RPG，一個無諗過做英雄嘅男主角「修爾克」，因為機緣巧合踏上「復仇」之旅，卻在旅程中一步一步接近世界上面發生嘅陰謀，結果擔上了拯救世界的重任。
遊戲當中，世界是一片汪洋，當年「巨神」與「機神」戰鬥過後，靜下來的軀體成了陸地，於是各種生命得以從「巨神」及「機神」身上發展及繁衍。以「身體」作為世界平台係一個好有趣嘅設定。
遊戲每一個地圖嘅面積都非常大（←每次去新地方都會即刻搵哂傳送點嘅人），每個地區都有非常明確嘅設計分別，例如係「帝都」夜晚嘅極光同埋流星雨，如果畫面可以進一步提昇嘅話一定會更靚。
當然如果你只係衝主線就 OK 嘅朋友，其實角色主要活躍地點都好集中；只係假如你同我一樣，有「全地圖開啟」強逼症嘅話，遊戲中仲有唔少巧妙嘅隱藏地域（例如係遺跡、秘境等）比玩家發掘。
例如呢個巨神遺跡
遊戲於塑做角色方面係好成功的。主角及一眾同行角色各有故事，而每個人嘅故事亦與主線劇情有所關連；同時，每個角色的性格亦非常鮮明。
作為一個愛好 RPG 嘅玩家，我通常會用一個非常唔專業嘅睇法去評價一隻 RPG 係唔係好作品，就係「我捨唔捨得爆機」以及「我會否真係覺得與呢班角色建立左感情，到爆機一刻會唔捨得」。
對上一隻令我有咁強烈感覺嘅有例如《Persona 5》同《Xenoblade 2》，而今次呢隻《異度神劍》同樣地比到呢種感覺我。
我玩得極投入。
係嘅，佢嘅故事王道，但劇情安排上還是有驚喜；主角好左膠大愛包容（咁一個王道 RPG……），同時會軟弱亦會優柔寡斷，但係正如萊恩於故事中所講，「正正係因為佢咁嘅性格，我地先會聚埋一齊，互相支援彼此」，呢一點我係好認同的。
RPG 好玩之處永遠唔係淨係得主角逞英雄，如何發揮團隊精神及合作力量，呢種「牽絆」先至係最吸引。
有玩過《Xenoblade 2》嘅朋友，相信都會認同佢嘅戰鬥系統做得非常精細；而《異》畢竟係前身，所以系統上比起《Xenoblade 2》簡化不少，有趣之處係佢並唔係回合制，而係混合 ATB 技能冷卻嘅即時動作戰鬥。
唔同戰技搭配、再配合你同行出戰嘅角色，使用嘅戰鬥方式亦會有所不同，呢一點賦予左玩家唔少自由度（題外話：我最喜愛使用嘅角色係力奇嗼！但係成日跳得唔夠嗼！）
講起角色之間嘅牽絆，雖然海恩塔公主梅莉亞人設好可愛，不過好可惜後期菲奧倫回歸之後，同修爾克呢對官配真係每一刻都放緊閃（笑）
肯定公主係貓奴！！
後期一直放閃，閃煞我的狗眼
不過我最鍾意嘅果然係諾彭族。同行嘅力奇實在太可愛了嗼。（「嗼」係佢地嘅口頭蟬）因為我本身有養一隻肥橘短毛貓，所以仲幫力奇換左件貓裝外觀 ♥（其實係老虎裝…）是的，遊戲可以幫角色轉換外觀造型。
《Xenoblade》被玩家討論得最多的另外一點，就係佢嘅支線數量。
不要說「任務太多」，試著說「遊戲很耐玩」，因為支線任真係接極都有，一波未平一波又起；NPC 又會分成早、晚嘅出沒模式，幾時要幫佢地搞移民亦係一門學門（有啲 NPC 一旦移民就換取唔到限定收集道具）；而支線任務玩法又真係成日重覆，例如係「打十隻 xxx」、去邊度搵一樣道具等等，淨係咁樣玩都可以一變四、四變十二，唔怪得可以有幾百個支線任，果然係傳統 JRPG。
點解我用左接近一個月先至打爆呢隻遊戲，係因為我有好強烈嘅強逼症，唔止要支線任務全清、仲要全部角色互通好感達到最高、同時要所有城鎮都達到五星、最後當然係「重建殖民地 6 區」要全部完美發展……
當然，支線任務唔係必須要做，只係假如你需要升 Level，做支線會係升 Level 以及角色好感度最快嘅方式。想壓等打嘅朋友，可以去 Menu 度揀選進階玩家選項，選擇降低返角色嘅 Level。
順帶一提，請記得開聲玩，因為《Xenoblade》嘅 Soundtrack 做得極佳，例如原野探索嘅音樂會有壯大嘅感覺、諾彭村落嘅音樂就和諧輕快（好有 Muji 舖頭播嗰啲 Feel）；遊戲音樂全部真人樂團演奏錄製，任天堂五年前有將佢地嘅 Studio Live 片段擺上 Youtube：
回首一望，我真係對左呢隻遊戲好耐，連放工坐車都係玩緊佢，之前含淚打《The Last Of Us Part II》時都要中途轉返《Xenoblade》黎調劑身心（喂）2020 年花我最多時間嘅遊戲，恐怕都真係《Xenoblade》了。
可以玩得咁耐，當然都係因為佢係一隻好玩嘅遊戲，雖然作為一隻舊作品移植，今年嘅遊戲獎項應該就無佢份；不過，假如你都係 RPG 愛好者，呢隻《Xenoblade》依然係我今年強力推薦之選！
評分：8 / 10（扣分位為復刻完仲係有少量 Bug、畫面問題）
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。