有返咁上下機齡嘅朋友應該都識《Mr. Driller》呢個系列，撇除近幾年出果隻「高質」手機 Game，都好耐無出過家用機版本。其實上星期就出咗隻《Mr. Driller DrillLand》，不過似乎無乜人知。我地試玩過發現幾過癮，所以特別為大家簡單介紹下。

竟然有 OP，開 Game 果陣比佢嚇親

《Mr. Driller DrillLand》其實係以 2002 GameCube 版為藍本，重新製作嘅作品，又由於 GameCube 唔太多人有，所以當新 Game 玩一樣 OK（老實講舊版我都無玩過）。遊戲表面上係一隻可愛畫風益智遊戲，實際上非常考腦筋。基本玩法係操控角色，一直向下鑽直到終點，當中同色嘅方塊會「黏」埋一舊，四格以上會消失。另外由於深入地底關係，所以氧氣係有限的，每秒鍾都會鑽一扣空氣存量，無晒空氣又或者被方塊壓中就會扣生命值，生命值無晒就 Bye Bye。

傳統玩法，趕時間又要計算方塊會唔會跌落黎，又要計氧氣，難玩得黎好上癮

遊戲所有對白都有語音，好揼本！

《Mr. Driller DrillLand》入面，主角們黎到「鑽頭主題樂園」，有五個不同嘅館遊玩，各有自己特色及玩法，比起上面講嘅基本玩法更有新意。個人覺得最得意嘅係「Horror Night House」，以鬼屋做主題，玩家要收集 20 粒水晶先可以逃離鬼屋，而水晶則由鬼魂持有，要擊敗鬼魂就要先拎聖水，再「射」聖水落方塊入面固定鬼魂，然後鑽爆方塊就得。概念成功融合捉鬼+ Mr. Driller 元素，有新意得黎又好玩。

鬼屋係無時間限制，但係因為會比鬼追，節奏反而更快

另一模式「The Hole of Druaga」，融合 RPG 元素，要儲道具打王

上面都講過其實《Mr. Driller》系列不嬲都好難玩，遊戲有得揀固有街機難度嘅「經典模式」，亦有為新手而設嘅「輕鬆模式」。如果「輕鬆模式」卡關都唔緊要，遊戲入面有道具商店，可以購買各種輔助道具。最緊係用 In Game 錢買就得，唔洗額外課金，幾佛心。

有 Easy Mode 揀，練熟先玩返街機 Mode

唔夠打可以買道具幫手

爆機後驚見「星之卡比」客串

《Mr. Driller DrillLand》已於 6 月 25 日推出，對應平台為 Nintendo Switch / PC Steam。另外遊戲提供單機離線對戰功能，最大支援四人同遊。