今個月有唔少朋友原本計好晒時間，不過《Last of Us Part II》搞到佢地失晒預算（編輯部沉迷緊《Desperado 3》）。如果你都覺得呢排悶無乜好玩的話，可以試下我地今次介紹呢隻作品《West of Dead》，遊戲質素唔錯兼且售價低，值得一試。

《West of Dead》由英國獨立遊戲開發商 Upstream Arcade 製作，採用美漫美術風格，使用傾斜視角，屬 Roguelike 動作遊戲。遊戲中玩家將扮演一位由地獄甦醒，並失去記憶嘅離魂者（Ghost Rider 咁款！），然後就出發去搵返記憶咁。特別一提，本作主角由知名演員 Ron Perlman 配音（即係做《Hellboy》位演員），加上遊戲入面嘅對白設計用心，感覺唔錯。

遊戲基本玩法係使用槍械配搭技能及被動道具。槍械分別係射速快嘅左輪手槍；長距離慢長槍以及高攻短距離霰彈槍，另外每把槍都會有附加不同能力嘅版本，會隨機於版圖中獲得。技能方面攻擊用嘅有投擲式炸彈、飛斧等等，亦有 Buff 類嘅加快上彈速度、護盾等等，不過就有人批評技能平衡度不足，期望之後會有所修正。

《West of Dead》最特別嘅地方，係著重「戰術」。遊戲話就話係動作遊戲，但實際上套用射擊遊戲慨念，例如要「上彈」。由於本作嘅槍械都係西部時代嘅舊式槍械，所以上彈時間需時頗長，所以好多時要依賴「掩體」，但係「掩體」係會被打爆的，所以適時使用技能硬食、走位比起操作技巧更為重要。另外，遊戲入面嘅敵人同樣會躲藏喺「掩體」後面「捕」你，但又會有犬隻呢類敵人，不惜一切淨係識衝過黎咬你，既要保命又要避免走出「掩體」，唔容易玩的。

順帶一提，遊戲中死亡會類似《Dead Cell》咁，係由頭開始過的。不過只要你搵到商人，就可以買到唔會因為死亡而重置嘅道具及技能。

《West of Dead》Xbox One 及 PC 版本已經上市，更已被納入 Xbox Game Pass 中（即係最少 HKD $10 就玩到）。另外 PS4 同 Nintendo Switch 版本預計於八月推出，支援繁體中文。