日本獨立遊戲工作室 Chilla’s Art 早前曾經推出一隻受《零》啟發嘅作品《Onryo | 怨霊》（詳情），雖然評價「褒貶不一」，但因為題材主要都係日本都會「都市傳說」，同埋價錢廉宜，所以都得到唔少玩家支持。黎緊又會有一隻新遊戲《幽靈列車》，今次就玩夜行列車都市傳說，先唔講遊戲質素，睇題材的確係幾吸引。

《幽靈列車》玩夜行列車都市傳說，呢樣野無論係邊個地方都有。好似香港就有「油麻地站墮軌女生」、「彩虹站死亡路軌」、「神秘站屈地站」、「831太子站殺人事件」等等，如果以呢類事件做題材相信大家都會有興趣。

當然，《幽靈列車》係日本人做自然會用返日本都市傳說，不過暫時就未係太多資訊。場景我地見到有列車內部、有其他乘客、有車站候車室等等，似乎會係夜間進入車站探索，又或者探索已被遺棄嘅車站。

另外本作嘅畫面係模擬 VHS 錄影帶影片材質，即係會有雪花同隔行掃描，務求令玩家喺遊玩過程更有實在感。

《幽靈列車》預計於 7 月 10 日正式發售，對應平台為 PC Steam，使用第一身視點。