【遊戲新聞】全新獨特遊戲體驗《It Takes Two》玩「情感」的動作遊戲

電影式遊戲越出越多，但係可以準確拿捏「影片」同「遊玩」比重嘅遊戲唔太多，有時仲會有啲遊戲過晒火，搞到玩家唔知係睇片定打緊機。喺呢類遊戲入面，有一隻曾經令我印象，就係 2018 年推出嘅《A Way Out》。《A Way Out》嘅製作人 Josef Fares 喺日前嘅 EA PLAY Live 發表會入面，正式公佈佢地黎緊嘅新作《It Takes Two》，而且仲保證玩家會得到全新獨特遊戲體驗，個人認為絕對值得期待。

《It Takes Two》由 Hazelight 製作，整過《A Way Out》同《Brothers: A Tale of Two Sons》二隻口碑甚佳嘅作品。遊戲故事講述 Cody 同 May 二夫婦正打算離婚，但係佢地個女 Rose 就唔想佢地分開，於是佢用木頭同黏土整咗二隻人偶，而呢二隻人偶又神奇地被賦予生命。實際上，呢二隻人偶代表嘅係 Cody 同 May，而玩家控制嘅就係佢二位嘅情感。「情感」喺呢隻遊戲入面，係同故事密切相關嘅重要元素，點樣透過控制父母情感，令到佢地打消離婚念頭就係本作嘅核心。

由於本作係玩 Cody 同 May 二個人間嘅「情感」，估計會好似《A Way Out》咁，不設單人模式，即係話一定要二個人先玩到。另外 Josef Fares 喺影片中提到，部份關卡入面，會針對佢地嘅「情感」製作特別嘅遊玩機制，同時亦都再一次結合劇情、遊玩同關卡設計，相信對玩家黎講會係一種全新而與眾不同嘅獨特體驗，絕對會令人耳目一新。