瘋魔全球嘅 RPG 傑作《Persona 5》雖然已係幾年前推出嘅作品，不過隨住動畫化及推出外國語言版本之後，人氣至今未減。當然 ALTUS 出品遊戲基本上都係信心保證，而《P5》亦在 2019 年 10 月推出加強版《Persona 5 Royal》，以及今次寫嘅《Persona 5 Scamble（女神異聞錄5 亂戰 魅影攻手）》。
《P5S》早於 2020 年 2 月 20 日已於日本發售 PS4 及 Switch 版，而繁體版本則將於 2020 年 6 月 18 日推出。《P5S》遊戲剛公佈時，由於係 ALTUS 聯同 KOEI 嘅 Omega Force 合作，所以唔少朋友都會先入為主地認為《P5S》係一隻無雙遊戲。
實際上，《P5S》依然係一隻 RPG，玩法、探索流程系統同正傳《P5》其實是一樣的，只係戰鬥部份由回合制式，變為動作模式，對於《Persona》系列玩家黎講，絕對係一種創新體驗。
先講講大部份玩家最為好奇嘅動作部份。《P5S》並唔係一隻傳統切菜式嘅無雙遊戲，但係就將 Omega Force 擅長嘅流麗動作系統，完美與《P5》嘅各種動作特色融和一體。
場上嘅雜魚敵人依然係大家於《P5》中見到嘅各種具備屬性嘅「Shadow（陰影）」，玩家除左可以使用普通物理攻擊之外，亦可以隨時於場上使用唔同嘅 Persona，嘗試去弱點攻擊敵方。
一旦觸動敵方弱點，就能夠進行「集體總攻擊」或者「追擊」等指令。同時，戰鬥中亦會隨機出現戰友嘅建議戰技，玩家亦需要不時留意畫面左上角嘅角色建議，按下指令，去令到戰鬥更有連攜效果。
同時，場景中亦有唔少可以活用嘅設施，例如掛勾可以進行快速飛躍、電子設施可以進行爆破加重傷害等等，令到「怪盜」嘅行動變得更加靈活有趣。
探索中，當然唔少得一眾角色各種有趣對白互動。嚴格黎講，《P5S》嘅劇情係連接住《P5》版本嘅發展，一眾角色為左全新任務，於暑假坐進旅行車，穿梭於日本各地，可以話係一隻濃縮版本嘅日本旅行團；所以，假如你玩完《P5》之後對於遊戲中嘅友誼團結念念不忘，又或者係今年無得去日本而感到寂寞，呢隻《P5S》絕對可以滿足你嘅「思鄉情懷」。
補充一點：正如上面提到，因為劇情緊接《P5》，所以《P5R》出現嘅新女主角並無登場，反而係新增另外兩位全新角色，於旅程中途成為可操控角色，陪伴玩家繼續歷險。
《P5S》嘅地城形式多變，由和風古道，去到雪山荒野都有，遊戲目前於 PlayStation Store 以及 Switch e-Shop 上面都分別推出了免費試玩 Demo，假如想率先感受遊戲全新氛圍嘅朋友，絕對可以於入手遊戲前搶先一試。
《Persona 5 Scamble（女神異聞錄5 亂戰 魅影攻手）》將於 2020 年 6 月 18 日推出繁體中文版，對應平台為 PS4 及 Switch。