曾開發著名恐怖遊戲《返校》嘅台灣遊戲工作室赤燭，為玩家帶來好消息！赤燭旗下力作《還願》上架後，由於素材包含「令對岸感到不快」嘅內容而被強逼下架，令一眾玩家非常擔心呢隻出色嘅好遊戲是否會因此會成為傳說。

不過，赤燭並無放棄到《還願》，雖然目前仲未搵到網上發行嘅渠道，但係佢地就於 2020 年 6 月 8 日於 Facebook 專頁上面宣佈，將推出遊戲實體版本，雖然目前係台灣地區限定嘅版本，但係相信香港區朋友，遲啲都仲係有機會可以入手到呢個作品！

遊戲預購期間由即日至 6 月 15 日起，並分為「還願DEVOTION 台灣限定實體版+遊戲原聲帶」以及「還願DEVOTION台灣限定實體版」兩個版本，分別定價為台幣 1,200 元以及台幣 980 元。

《還願》為一隻第一視點恐怖遊戲，原本於 2019 年 2 月 19 日於 Steam 上架，故事講嘅係一家三口，因為佢地深信自己嘅虔誠，一定可以為自己帶來幸福；但係，佢地無諗過，佢地「幸福」嘅生活，居然正正因為自己嘅「虔誠」而將呢個小小的家變成一個煉獄。

然而，遊戲推出後不久，比人發現遊戲裡面符咒圖素上，有發音似「你媽87」嘅「呢」、「嘛」、「叭」、「唭」字樣，以及「熊維尼習近平」嘅字眼，因為成為政治打壓目標（相關報導）

雖然遊戲被強行下架，不過《還願》至今都仲係唔少玩家喜愛嘅直播題材，好評不斷，亦令到遊戲熱潮從未退減。今次台灣限定上市，唔知遲啲會否有機會開放埋香港市場呢？

＜實體版連結＞