唔知大家有無睇過一套作品《Hellsing》，作品中基督教團以暴力血腥嘅手法除魔，呢種設定充滿住莫名嘅魅力。將於今年推出嘅新作《One Shell Straight To Hell》，主角將扮演暴力神父，以基督之名狩獵惡魔。

《One Shell Straight To Hell》由 Shotgun with Glitters 開發，加入 Rogue-lite 隨機迷宮生成探索要素，屬動作射擊遊戲，採用俯瞰式視角。遊戲中玩家所控制嘅主角，其實係梵蒂岡電視台著名主持人，同時佢仲係國際間唯一得到惡魔狩獵許可證嘅聖職者「Padre Alexander」。今次嘅任務，就係進入連接現世同地獄嘅大門，將企圖進入現世嘅惡魔擊殺！

玩家進入隨機生成迷宮，使用各種類型槍械殺敵。遊戲中亦都有角色技能樹，玩家透過解鎖各種技能提升能力。不過最正嘅係遊戲入面仲加入埋「塔防」嘅元素，玩家喺探索過程中建立據點，並且建築十字弩炮台等防禦工事，幫助戰鬥。

《One Shell Straight To Hell》預計於今年內發售，對應平台為 PC（Steam） / 家用機（平台未定）。另外有關主角過去嘅前作《The Padre》喺 Steam 上已經發售，有興趣嘅玩家可以先玩舊作了解背景（注意：呢隻算係 RPG 黎）。