近年知名購物網站 Amazon 銳意進軍遊戲界，之前發布隻 MMORPG《New World》就仲未有得玩，但係另一隻 FPS Game《Crucible》其實喺幾星期前已經開放下載，不過之前只限北美地區所以 Miss 咗。最近終於等到佢開放埋其他地區，一試之下發現有唔少缺點，但係遊戲慨念、玩法都頗具潛力，相信修正問題後會係一隻出色嘅遊戲。

《Crucible》由 Amazon 旗下 Relentless Studios 開發，採用第一身視點，屬傳統 FPS 遊戲。話就話係傳統 FPS 遊戲，但係佢融合咗 PvP 同 PvE 嘅要素，玩家需要尋找獵物擊殺，收集經驗值升級；同時又要搜索敵對玩家，偷襲阻止佢地升級。同其他有英雄嘅射擊遊戲一樣，每位由玩家所扮演嘅獵人，都有各自特性及技能，有最常見用機槍+跑步為主戰術嘅英雄（即係《Overwatch》嘅 76）；有中距離噴火持續傷害嘅英雄；亦有坦型近戰英雄，各有特色。

現時有十位角色選擇，不過平衡度就真係一般

遊戲現時提供三種模式，分別係「Heart of the Hives」、「Alpha Hunters」、「Harvester Command」。

「Heart of the Hives」類似傳統佔點玩法，但係追加咗新變化。玩家會與其他三人組成小隊，喺地圖中殺怪殺人升級，一定時間後會出現巨大 Boss，擊殺後會出現「心臟」，最先搶到三個心嘅隊伍勝，屬 4 vs 4 對戰。

「Alpha Hunters」就類似大家見慣見熟嘅大逃殺玩法。將與另一位玩家組成二人小隊展開戰鬥。特別之處在於當玩家隊友死亡後，你可以去搵其他同樣死咗隊友嘅敵人組成新隊伍再戰。但係當你地嘅隊伍成為場上最後一隊時，你同你嘅新隊友都要殺死對方先當贏，因為系統只會計原生隊伍成員為「一隊」，本模式最大容納 16 位玩家。

「Harvester Command」即係傳統嘅佔點玩法，鬥快控制據點，最先得到 100 分嘅隊伍勝利，最大容納 16 位玩家，8 vs 8 對戰。

《Crucible》雖然只係上架短短二星期，但係 Steam 嘅評價已經跌到去「褒貶不一」，就如同文首所講，本作仍然有好多缺點需要改善。最明顯嘅係遊戲優化奇差，Drop Frame 問題嚴重；再者連線質素亦都麻麻，以一隻射擊遊戲黎講的確係致命傷。另外仲有射擊感古怪、地圖過大變得同敵隊交戰機會不多、節奏散漫、升級優勢並不明顯等等。不過，由於目前遊戲仍處於公開測試階段，仲有好大嘅改善空間，相信修改以上問題後會係一隻出色嘅遊戲，建議大家可以放入觀察 List。

《Crucible》已於 5 月 21 日於 Steam 免費上架，暫時並不支援中文。