由 Afterburner Studios 工作室開發嘅全新作品《Dreamscaper 層層夢境》係一隻 Roguelite 風格即時動作遊戲。遊戲早於 2020 年 4 月份時，已於 Steam 平台上免費公佈序章《Dreamscaper：Prologue》，獲得壓倒性嘅好評，官方最近就釋出全新預告片，並表示遊戲將於 2020 年夏季開始 Early Access，同時開始考慮擴展平台到 Switch、PS4 及 XBox One 上面。

玩家於《Dreamscaper 層層夢境》裡面，飾演患有嚴重抑鬱症嘅女主角凱西迪（Cassidy），每晚都必須與惡夢對抗。每次玩家於惡夢中死去，就會於現實中醒來，而於夢中嘅一切（包括角色成長、環境設置等）都會重置，令玩家再次入夢時可以經歷全新設計嘅歷險。

遊戲分為「日間」與「黑夜」兩個部份。日間時，玩家可以探索城市，到訪酒吧、公園、體育館等場景，並與 NPC 互動建立友誼關係。你與城鎮居民關係越深，於夢中戰鬥時嘅力量就會越為強大，亦可以獲得更多物品及武器；直至黑夜來臨，玩家就會入夢，開始戰鬥。

戰鬥同時具備近攻、遠攻、迴避、格擋等等動作遊戲元素，玩家進入夢境越深，就可以解鎖更多新技能；將它們進行妥善運用，就可以克服更多敵人。

到底玩家可以征服幾多次惡夢、又可唔可以成功治癒 Cassidy 嘅抑鬱症，呢個將會係遊戲嘅終極目標。有興趣感受遊戲嘅玩家，可以去以下連結試玩遊戲前傳：