預計今年推出嘅《刺客教條 維京紀元》（Assassin’s Creed Valhalla），暫時淨係得條 Trailer 睇，實際系統係點仍然係一個謎，淨係話會有重大改變。日前遊戲創意總監 Ashraf Ismail 接受訪問時，就透露更多資訊，最令人驚喜嘅就係今集竟然唔再係依靠「殺」黎解決一切！

有玩過《刺客教條》嘅朋友，相信都會有一個印象，就係無論你有咩問題，只要殺咗相關目標就搞掂。不過根據外媒 GameSpot 嘅報導，黎到今集情況有所改變。早前 Ashraf Ismail 接受外媒 Kotaku 訪問時，喺今次遊戲中將會出現更多非暴力選項，雖然你係扮演緊嘅係驃悍嘅維京戰士。同時，佢仲講到喺《維京紀元》世界入面，無論你做咩都好，都會無可避免地捲入政治漩渦當中，喺呢啲時候，談判無疑係解決問題最有力嘅手段之一。

另外，Ashraf Ismail 仲有講及現時團隊正著手研究遊戲進度系統，以及新任務展開等等，希望藉由賦于玩家更多權限，避免探索世界時受到不必要嘅限制，簡單啲講就係唔想大家玩到某啲位卡住，令開放世界更開放。但係講到卡關，好多時都因為 LV 不足，而 Ashraf Ismail 就無透露會唔會好似《Odyssey》咁，有「XP booster」呢樣野。 不過 GameSpot 報導入面都有講到，In Game 微交易系統多數都有，始終《Odyssey》時的確為 Ubisoft 帶黎可觀嘅收入。

《刺客教條 維京紀元》仲會將系列入面早期嘅元素重現，其中袖劍將會重現「秒殺」嘅能力，但係咪只限特定條件下（例如暗殺）先可以達先「一擊必殺」，就要等詳細消息公佈。遊戲預定於 2020 年第四季發售，對應平台為 PS4 / PS5 / Xbox One / Xbox Series X / PC / Stadia。