備受 Fans 期待，衍生自日本國民 RPG《勇者鬥惡龍》嘅漫畫作《達爾大冒險》（神龍之謎），喺琴晚嘅《勇者鬥惡龍》發售 34 周年直播活動入面，正式公佈三款新遊戲，並分別於家用機、手機、街機上推出，另外重製版動畫將會於 10 月正式正阿！

三款作品入面，最吸引嘅相信都係家用機 ARPG 遊戲《勇者鬥惡龍 達爾大冒險 無限斬》。本作主線劇情同大家熟悉嘅舊版情節相同，都係主角達爾打敗魔王踏上旅途嘅故事。公佈嘅影片入面，展示咗部份嘅劇情及戰鬥畫面，根據有限嘅資料，戰鬥系統將類似早前推出嘅重製版《聖劍傳說 3》，都係有角色特定招式，依靠走位及連技進行戰鬥，不過節奏更為快速。

另外影片入面顯示有同伴雷歐娜跟隨，亦會協力使出超必殺技，但係就未知有無得切換使用角色。《勇者鬥惡龍 達爾大冒險 無限斬》預計於 2021 年發售，目前只知道會於家用機推出，並未知邊個平台。

另外二隻遊戲分別係手機遊戲《勇者鬥惡龍 達爾大冒險 -魂之絆-》以及街機遊戲《勇者鬥惡龍 達爾大冒險 XROSS BLADE》。前者由 SE 同 DeNA 共同製作，採用直立畫面前進突破關卡「大爆進」遊玩方法。遊戲中分別有魔法師、僧侶、武鬥家等職業，以三位隊員編成對伍戰鬥，著重角色定位及戰鬥配置安排，支援協力合作遊玩，同樣預計於 2021 年推出。

街機遊戲《勇者鬥惡龍 達爾大冒險 XROSS BLADE》，由 Takara Tomy A.R.T.S 開發，係一款卡牌遊戲，都係課金買卡再擺係機面上面玩，操控方式就類似《三國志大戰》咁，不過香港正路就無機舖入架啦，反而 AEON 果類玩具部有可能會見到。預計 2020 年秋季推出。

最後係新版電視動畫《達爾大冒險》嘅消息，喺節目入面，《勇者鬥惡龍》系列之父堀井雄二先生就特別提到新版動畫故事可以完結，有別於舊版動畫只去到故事中間，所以新版動畫係令人相當期待。當然除咗劇本之外，新版動畫嘅聲優陣容都非常強大，主角達爾聲優由種崎敦美擔任，另外仲有豊永利行、小松未可子、早見沙織、櫻井孝宏、梶裕貴等等，陣容華麗。預計於今年十月放映。