每個玩《動物森友會》嘅玩家，每日都要進行送禮物、敲石仔、掘化石等等「島務」，但係你又有無試過唔記得送咗野比邊位村民；唔記得掘咗幾多粒化石；釣時限性嘅魚、蟲等等。有見及此，今次就介紹下我地編輯部都用緊嘅 APP，方便大家進行日常「島務」，順便分享喜悅。
今次介紹嘅 APP 叫做「ACNH Guide」，輔助功能頗為全面，可以話係綜合咗大部份玩嘅要注意嘅項目，並且係免費下載的（作為等價交換，喺 App 下方會有廣告 Banner）。喺使用呢個 APP 之前，需要做一次設定先。玩家要先輸入島上嘅資料，例如有邊隻村民、已經捕捉過嘅魚 / 蟲、已經捐贈過嘅美術品 / 化石 / 魚 / 蟲等等。輸入完成後，首頁就會出現每日「島務」完成度、生日提醒、已收集物品進度、已捐贈物品進度等等，方便隨時檢查自己有咩未做。
方便玩家隨時 Mark 住每日「島務」進度
博物館化石一頁，唔係求其以一條龍黎做單位，而係分返晒每個部份黎紀錄，要查返有咩部位未收集都極之輕鬆
連 K.K 歌曲都有得 Set 收集完成度
除咗以上項目，喺首頁下方仲會有每日可捕捉魚類及蟲類，並且會有提示有邊啲係未捉的。另外當你撳入去相關圖示，仲會顯示該種魚/蟲嘅詳細資料，例如棲息地；北半球 / 南半球出現月份；出現時間等等，一目了然。
村民一欄可以睇晒所有動物，而且每隻動物都有相關資料供查閱。生日日期、種類呢啲基本野當然有，就連性格、喜好、鍾意嘅顏色都有顯示。另外如果該動物未成為你島上嘅居民，都可以先將佢放入「我的最愛」，Mark 定有邊啲候選居民以防遺漏。
除咗以上功能，「ACNH Guide」仲提供埋大頭菜計算器，去計算黎緊嘅大頭菜升跌走勢。另外實用功能仲有花朵配色表，表入面顯示晒現時八種花嘅配色方法、獲得方式及機率，非常方便。
「ACNH Guide」將會隨遊戲更新而持續更新，唯一可惜嘅係現時並未提供中文版本，玩家輸入資料時係比較煩。不過作者就有講到，喺未來嘅日子會追加其他語言，想快啲有中文版嘅不妨去佢 Twitter 表達意願。
動漫電玩宅，極愛金田一系列，擅長動作及策略遊戲