我地極為欣賞嘅角川推理遊戲《方根》系列，宣傳果陣就話會 Keep 住出續集，但係自從《方根書簡 Last Answer》推出後就仲未有新作玩（其實 Last Answer 我都唔當係新野）。日前系列第二部作品《方根膠捲》，正式宣佈推出時間，並且將會同日文版同步推出繁體中文版。

遊戲故事講述新晉導演八雲凜太朗應邀參加一套電視劇拍攝工作，劇嘅內容係以島根縣為舞台，兼具觀光宣傳性質嘅懸疑推理劇。但其實呢套劇喺十年前曾經因為不明原因中止拍攝，而家就係突然拍返。當劇組等人前往拍攝場地先行勘景時 ，所到之處都分別發生神祕嘅殺人事件，藏於 29.97 畫格嘅殺意就此揭開序幕。

.

遊戲以日本島根縣為舞台，同上集一樣都會出現大量當地嘅景物增加真實感，而遊戲系統就有啲類似《逆轉裁判》系列咁，都係收集各種資訊、偵查、辯論，不過故事就更為完整以及有多重結局。另外今次新增「共感模式」，喺對話時，會將部分詞句認定為「不能忘記的關鍵字」，玩家獲得呢啲關鍵字後，喺辯論環節「MAX模式」中將作為籌碼。附帶一提，沿襲自《√Letter方根書簡》嘅辯論環節將進化為富格鬥遊戲風格嘅形式，系統亦都有全面改良翻新。

作為文字冒險推理遊戲，遊戲嘅好與壞絕對取決於劇本嘅優劣。《方根膠捲》嘅劇本係由曾製作《Clock Tower》嘅河野一二三負責，已經係信心保證。遊戲將於 7 月 30 日發售，對應平台 PS4 / Nintendo Switch，並有繁體中文版。