喺《動物森友會》入面，有一堆 NPC 角色係不定期出現的，例如賣地氈嘅駱嵐、賣偽術品嘅狐利、賣灌木嘅然然等等，當中又以狐利最為重要。但係好多時等極都唔見狐利，甚至試過做時空旅人連續 2 – 3 星期都見唔到佢。日前曾掘出未來大更新嘅 @ninji 就再有新發現，就係呢班 NPC 出現嘅公式。

呢幅圖其實唔關事，想試下啲 Amiibo 卡 Only

《動物森友會》入面每個星期都會有唔同嘅 NPC 出現，而呢堆 NPC 又會分為二種，一種係「必定出現」，例如係 K.K 同賣大頭菜嘅曹賣。另一種係「隨機出現」，例如係賣地氈駱嵐、賣偽術品狐利、收購昆蟲龍克斯等。

根據 Ninji 嘅數據，只要完成 NPC 出現嘅特定條件後，喺每個星期一到星期五入面，每日會隨機出現駱嵐、薛革或者然然其中一位。然後剩底嘅二日就會出現俞司廷、龍克斯、呂遊、綿兒同狐利任意二位。又由於 K.K 固定於星期六出現，曹賣固定星期日出現，佔據隨機 NPC 名額，所以其他幾位隨機 NPC 唔會出現。

舉個例子，例如星期一係駱嵐、星期二薛革、星期三然然，咁星期四同星期五就必定會出現俞司廷、龍克斯、呂遊、綿兒、狐利當中二位。另外如果隨機 NPC 喺本週無出現過的話，下週將會提高到訪嘅機率。利用呢個特性，就做時空旅人時就會更有效率。

另外只有晚間出現嘅 NPC，公式同上面堆 NPC 係分開計算的。妹妹傅珂只會出現係好天嘅夜晚，當佢出現時好大機會會遇到流星雨。至於「無膽鬼」幽幽就每晚都有機會出現，得閒巡多幾次島啦。

最後順便講下狐利販賣嘅模式，喺架走私船上面會有六個欄位，1 – 4號位係藝術品，5 – 6號位販賣稀有級別家具。當中藝術品又會有以下四種機率：10% 一件假貨 +  三件真品；30% 二假二真； 50% 三假一真；10% 四假零真，唔好再信啲流言話一定最少有一件真貨啦！