【遊戲新聞】網絡熱傳高階版PS5手制變形獨立屏幕勁有型

新世代主機大戰年尾就正式開波，不過 Sony 陣營主機係點樣，跟咩都未知，淨係知道新手制「DualSense」外觀同相關功能。早前就一條片段喺網上熱傳，內容係一隻「疑似」高階版 PS5 手制嘅演示，不但有獨立屏幕仲識得變形，勁有型！

影片內容非常簡單，就係拎住一隻疑似係 PS5 手制「DualSense」實測。不過細心睇就發現並唔係「DualSense」，更似係高階版手制，就好似 Xbox 嘅 Elite 制咁。喺影片中嘅手制設有獨立屏幕，而呢個屏幕顯示嘅係屬於追加資訊。例如係選擇遊戲時顯示遊戲名稱及圖片、遊戲中顯示地圖等等，感覺類似「3DS」下方顯示屏。

另外呢隻手制有一個「變形」功能，按下後手制會左右擴展，露出隱藏嘅六粒按鍵。呢幾粒按鍵睇片就似乎係虛擬按鍵，即係 Touch Screen 上顯示嘅「按鍵」，而呢幾粒按鍵應該係容許玩家自定議用途，意味住多六粒快捷鍵。

#Nice #PS5

由 Guarida Gamer 發佈於 2020年5月13日星期三

當然以上嘅「分析」都係基於隻手制係真，而我地同事間都曾經詳細討論過影片嘅真偽，大家都認為可信性都幾高下。例如製作部同事話「佢拎手制時屏幕光源唔似做假，加上變形時聽得出有機械聲」；另一位同事就話「手制嘅部件太多，加上咁多特別野維修部一定要預好多錢，所以無乜可能係跟機件，係真嘅都要另購」；「部主機入面有《Watchdog》同《Cyberpunk 2077》，好大機會係開發機，咁有新手制就講得通」。另外手制有獨立屏幕並唔係咩新鮮野，好似任天堂上一代主機「WiiU」，佢嘅手制就有類似設計，綜合以上種種得出嘅結論就係「高階 PS5 手制」。