LEGO Monkie Kid 悟空小俠 呢個全新產品系列，都可以算係今年最具話題性。無他嘅，全球對中國反對聲音不絕之下，用《西遊記》去做產品主題，世界各地玩家定必有爭議。既然好多人未玩先判嘅時候，我地就更加要開箱比大家睇，究竟佢係咪如坊間好多人所講嘅不倫不類。而率先同大家開箱嘅，係今次 LEGO Monkie Kid 悟空小俠 首波產品最大盒嘅 80013 Monkie Kid’s Team Secret HQ 萬能海上基地。

80013 Monkie Kid’s Team Secret HQ 萬能海上基地 – 1959 件 – USD $169.99 (香港售價 $1499)

1959 件組件，有總共 19 包加 1 包特別組件包

製作說明書都分 5 本，除左第一本外，另外四本內容都係製作成個基地嘅過程

貼紙多，但未去到一個好過份嘅狀態，但唯獨係對於 3 號貼紙用左「簡體字」，真心感到可惜同不解。

砌主體之前，我地先睇左主角齊小天 (Monkie Kid)、朱大廚 (Pigsy)、沙大力 (Sandy)、龍小驕 (Mei) 同埋牛魔王大軍佢地嘅 Minifigures 同載具先。

齊小天 (Monkie Kid) 唔只有全新髮型、雙表情，仲有個掛頸 Headphone 配件，啱晒自組 Minifigure 造型嘅玩家

今次腳兩側都有印啊！

變身造型！金剛棒真係用返金色件！

機甲招喚

齊小天 (Monkie Kid) 機甲

簡單活動關節設計，配合手掌中嘅”窿”，令支金剛棒可以喺機甲手上固定得到

朱大廚 (Pigsy) 個頭全新開模特製

朱大廚 (Pigsy) 嘅載具本身就冇乜特別設計，但有個好值得一提嘅部份，當中有兩粒 1×1 嘅組件，竟然特登印返隻眼上去，呢兩粒件都算係難得啦！

沙大力 (Sandy) 以 Big Figure 造型，而故事人物設定佢係個貓奴，所以喺 80013 唯一一盒有佢嘅愛貓毛毛出現

但唔好漏左佢對腳，波鞋配運動褲，睇落仲有啲似 A 字頭運動品牌產品添

龍小驕 (Mei)，雙髮髻呢個髮型之外，仲可以變身做成個「超級戰隊」造型

佢嘅載具亦設計到配合佢「白龍馬家族」嘅身份

牛魔王大軍雜兵 (牛雜兵？！)除左牛角同身上用唔同配件去分別之外，所有用件都一模一樣

就咁睇個頭盔設計，點解會聯想到似「渣古」呢？

製作過程

二千件組件聽落都唔少，但實際上只係用左大約 5 個鐘左右就完全完成。始終 LEGO Monkie Kid 悟空小俠系列嘅受眾係兒童，所以製作過程冇咩花巧，冇咩特別砌法。雖然係咁，但因為結構上重複嘅位亦都唔多，所以亦非沉悶。下面條片就係成個躉船主體嘅Speed Build片段。

完成

外觀上，呢架貨櫃躉船其實同 70620 NINJAGO City 以及 70657 NINJAGO City Docks 非常相似並且相襯

點解我會知隻貓叫毛毛，都係因為呢個貓門

呢個冷氣機定抽氣扇，算係 80013 入面我最深刻嘅設計

如果呢個”MONKIE!”嘅塗鴉係印刷件，你話幾好呢

船頭朱大廚 (Pigsy) 個烤爐，其實內有乾坤

下面收埋左「好大一支槍」

而本身未將整隻船打開嘅狀態，其實呢三部係可以比玩家輕易拆開，方便睇到船內情況

正式打開晒嚟睇睇啦！

左邊兩個貨櫃，其實係齊小天 (Monkie Kid) 機甲倉庫

右邊部份就係廁所、貓屋同埋所有角色嘅起居室

廁所內部都設備齊全

張吊床咁大張，都知比邊個瞓啦

講明萬能海上基地又點會促得一部機甲咁少，船尾部份其實係朱大廚 (Pigsy) 同龍小驕 (Mei) 載具倉庫，而且打開船尾機關就可以即刻落水進行攻擊

總結

躉船呢件野喺 LEGO 官方產品主題嚟講，可以話少之有少，外觀以躉船去做藍本已達罕有呢點，三個貨櫃外觀實際組成基地內部兼有埋裝修。再者用件又新又刁鑽，砌嘅時候都有好幾下「啊！咁都比你諗到！」嘅感覺。加上佢收收埋埋唔少機關，但外觀上完全可以隱藏得好好，比大家一種驚喜。Minifigures 角色設計就真係見仁見智，我就覺得冇HEA做，配件就非常搶眼新鮮，而且設計上絕對可接受範圍之內。

80013 Monkie Kid’s Team Secret HQ 萬能海上基地 係咪完美產品？雖不中亦不遠矣，當玩家將 80013 拎上手玩嘅時候，好正常都會雙手捧住船身兩側，但兩側 (即係有兩個車軚嗰部份組件) 捧起嘅時候係非常容易鬆脫，呢個絕對係扣最多分嘅地方。個人扣埋張「簡體字貼紙」呢分，如果都改善埋，佢絕對能登今年十大必入產品頭五名之內。

最後，作為一個全新自家原創系列嘅第一波產品，就將價錢定於過千，呢個門檻的確高左少少，而且定價都可以話幾進取。不過如果喺價錢同產品質數掛勾的話，咁佢又物超所值喎！80013 Monkie Kid’s Team Secret HQ 萬能海上基地 可以用「藝高人膽大」五個字去總結，今次係有失手嘅地方，但LEGO Monkie Kid 悟空小俠 呢個全新產品系列，玩完 80013 呢盒，令我期待佢第二波產品繼續可以比到驚喜我。

80013 Monkie Kid’s Team Secret HQ 萬能海上基地

發售地點：LEGO Certified Store
地址：
- – Langham Place L12 Shop 01B
- – Times Square Shop 902-3C
- – New Town Plaza Shop 416
- – Cityplaza Shop 012
- – Tuen Mun Town Plaza Shop 2217